Уладзімір Зіноўскі прадставіў канцэпцыю праграмы сацыяльна-эканамічнага развіцця Аршанскага раёна

Уладзімір Зіноўскі сёння наведаў з рабочым візітам Аршанскі раён. Мэта паездкі - абмеркаваць асноўныя падыходы да развіцця раёна і запрасіць прыватны бізнес да распрацоўкі праграмы сацыяльна-эканамічнага развіцця. Адкрываючы сустрэчу з прадстаўнікамі ўлады і бізнесу, Уладзімір Зіноўскі акцэнтаваў увагу на пяці асноўных задачах праграмы: стварэнне ўмоў для ўстойлівага эканамічнага развіцця раёна, росту даходаў насельніцтва, устараненне тэрытарыяльных дысбалансаў па працы і заработнай плаце, скарачэнне адтоку працоўных рэсурсаў, камфортныя ўмовы пражывання. Вырашэнне гэтых задач патрабуе эфектыўнага развіцця разам з дзяржсектарам прыватнага бізнесу, які валодае большай мабільнасцю і ўспрымальнасцю да новага, таму адзін з ключавых блокаў праграмы - развіццё прадпрымальніцтва.

"Сёння хацелася б абмеркаваць, у якіх напрамках малы і сярэдні бізнес ужо гатовы актыўна прымаць удзел у развіцці раёна, якая падтрымка з боку дзяржавы для гэтага неабходна і на якія рэсурсы разлічвае бізнес", - прапанаваў Уладзімір Зіноўскі. Кіраўнік міністэрства праінфармаваў аб рабоце па спрашчэнні ўмоў вядзення бізнесу, праводзімай у краіне. У прыватнасці, плануецца спрасціць парадак і ўмовы адкрыцця аб'ектаў гандлю, сацыяльнага абслугоўвання і грамадскага харчавання, атрымання дазволаў і ўзгадненняў, а таксама аптымізаваць санітарна-эпідэміялагічныя і пажарныя патрабаванні. Прадугледжваецца скарачэнне колькасці ліцэнзуемых відаў дзейнасці і пашырэнне пераліку відаў дзейнасці, якія не належаць да прадпрымальніцкай. Паводле слоў міністра, невыкарыстоўваемыя плошчы дзяржсектара - гэта яшчэ адзін рэзерв для развіцця вытворчага бізнесу. Цяпер праводзіцца рэвізія аб'ектаў нерухомай дзяржаўнай маёмасці ў раёне.

"У выніку будзе сфарміраваны пералік аб'ектаў, якія можна прадаставіць на пэўных умовах бізнесу для стварэння новых прадпрыемстваў і вытворчасцей", - падкрэсліў міністр. У ходзе сустрэчы Уладзімір Зіноўскі таксама акрэсліў ключавыя напрамкі і праекты праграмы, лакаматывам якой з'яўляецца вытворчы блок. На базе дзеючых дзяржаўных прадпрыемстваў плануецца стварэнне новых вытворчасцей. Аднак Мінэканомікі не задавольвае тэрмін акупнасці асобных праектаў. "Для падтрымання канкурэнтаздольнасці на сусветных рынках тэхналогія і абсталяванне павінны абнаўляцца на радзей, чым праз пяць гадоў. Гэтага тэрміну акупнасці пажадана прытрымлівацца пры распрацоўцы інвестыцыйных праектаў", - звярнуў увагу міністр. Уладзімір Зіноўскі адзначыў, што фарміраванне кропак росту ў Оршы, Барані, Балбасаве, Арэхаўску і Копысі адкрывае перад малым і сярэднім бізнесам новыя магчымасці. У якасці такіх ён назваў стварэнне прыватных швейных прадпрыемстваў у ільняным кластары, удзел у збыце прадукцыі на знешнія рынкі. Новы транспартна-лагістычны цэнтр у Балбасаве таксама адкрые вялікія магчымасці для прыватнага бізнесу.

 Характарызуючы сацыяльны блок праграмы, Уладзімір Зіноўскі падкрэсліў, што яго асноўная задача - стварыць камфортныя ўмовы для пражывання насельніцтва. Адзін з прыярытэтаў - вырашэнне пытанняў даступнасці жылля, у тым ліку за кошт зніжэння вартасці квадратнага метра. У ліку прыярытэтаў таксама якасная дарожная інфраструктура, стварэнне рабочых месц у межах гадзіннай даступнасці, рост якасці гандлёвага і бытавога абслугоўвання ў вёсцы, падрыхтоўка кваліфікаваных кадраў па рабочых прафесіях. "Ад таго, на якой культурнай платформе будзе адбывацца выхаванне моладзі, залежыць будучае раёна, вобласці, краіны ў цэлым, - заявіў Уладзімір Зіноўскі. - Мінэканомікі гатова разгледзець любыя канструктыўныя прапановы ад бізнесу. На сённяшні дзень намі падрыхтавана структура праграмы. Яе напаўненне мы будзем дэталёва адпрацоўваць не толькі з мясцовай уладай, міністэрствамі і канцэрнамі, але і з бізнесам. Таму чакаем ад прадпрымальнікаў актыўнага ўдзелу ў гэтай рабоце і канкрэтных прапаноў у праект праграмы", - рэзюмаваў Уладзімір Зіноўскі. Міністр таксама наведаў прадпрыемства па вытворчасці ўцяпляльніка "Акатэрм-флакс", швейны цэх і вытворчасць па перапрацоўцы каляровых металаў ТАА "Маналіт ПДМ" і ААТ "Аршанскі камбінат хлебапрадуктаў".

У час сустрэч з кіраўніцтвам прадпрыемстваў абмяркоўваліся перспектывы развіцця арганізацый і праблемныя пытанні іх функцыянавання.

Алёна Ціханава - БЕЛТА.