75+70. Цэнтр культуры "Віцебск" адзначыў дзве юбілейныя даты

«Найлепшы Цэнтр культуры, таму што ў Віцебску» – такі слоган стаў загалоўным на ўрачыстасці ў гонар 75-годдзя галоўнай установы культуры абласнога цэнтра і яго 70-га творчага сезона. Святочнае мерапрыемства прайшло на сцэне канцэртнай залы «Віцебск».

Калі дакладней – гэта была фінальная частка юбілею.

Раней Цэнтр культуры «Віцебск» запрасіў усіх жыхароў горада на Дзвіне на Дзень адкрытых дзвярэй. Ахвотныя, а іх было нямала, трапілі на адкрытыя ўрокі таленавітых педагогаў. Не толькі пазнаёміліся з творчымі калектывамі, але самі паспрабавалі сябе ў розных накірунках мастацтва.

Зазірнулі ў «закулісны свет» – на рэпетыцыі і нават на «Свята ўраджаю» ў парк Мазурына.

І ў абавязковым парадку здзейснілі шпацыр па знакавых мясцінах Міжнароднага фестывалю мастацтваў «Славянскі базар», дырэкцыя якога знаходзіцца ў Цэнтры культуры «Віцебск».

Працягам знаёмства з «Найлепшым Цэнтрам культуры», яго гісторыяй станаўлення і поспеху стала фотавыстава ў скверы канцэртнай залы, а таксама прэзентацыя кнігі пра гісторыю ўстановы.

Юбілей творчага калектыву можна ўявіць у лічбах: 75 кранальных гадоў памяці, 75 сотняў непаўторных гісторый, 75 мільёнаў натхнёных людзей, 70 дзясяткаў асаблівых працаўнікоў, 70 тысяч таленавітых дзяцей. З гэтага і складаецца Цэнтр культуры «Віцебск».

– На сённяшні дзень Цэнтр культуры «Віцебск» – адзіная ўстанова ў краіне, дзейнасць якой складаецца з працы філіялаў, творчых калектываў і праектаў, як традыцыйных, так і новых, – адзначыў генеральны дырэктар Цэнтра Глеб Лапіцкі.

Першая частка ўрачыстасці ў канцэртнай зале была прысвечана ўшанаванню калектыву і ўзнагароджанню яго работнікаў. Перад пачаткам цырымоніі гучалі віншаванні ад сяброў Цэнтра культуры «Віцебск» – вядомых артыстаў, прадзюсараў з розных краін – удзельнікаў і гасцей зорных фестываляў, якія арганізуе крэатыўная каманда ўстановы. І ўсе пагаджаліся ў адным: гэта лепшы Цэнтр культуры, шмат у чым дзякуючы яму Віцебск лічаць культурнай сталіцай Беларусі.

Пра гэта таксама гаворыцца ў прывітальным адрасе старшыні Савета Рэспублікі Нацыянальнага сходу Наталлі Качанавай, які зачытаў старшыня аблвыканкама Аляксандр Субоцін.

– Сімвалічна, што ў першыя нялёгкія пасляваенныя гады, калі ішло аднаўленне краіны, было прынята рашэнне аб стварэнні ў Віцебску ўстановы культуры. Тады ўрад палічыў, што гэта вельмі важна. За мінулыя гады вы даказалі, што нясеце свету добрае, светлае, вечнае. Міжнародныя фестывалі не толькі фарміруюць імідж краіны, але і дапамагаюць расфарбаваць наша жыццё яркімі фарбамі, – дадаў ад сябе кіраўнік вобласці і ўручыў Ганаровую грамату Савета Рэспублікі намесніку генеральнага дырэктара па спецыяльных праектах Цэнтра культуры «Віцебск» Марыне Раманоўскай.

Ганаровай граматай аблвыканкама ўзнагароджана кіраўнік народнага маладзёжнага тэатра «Кола» Уладзіслава Цвікі.

Шэраг работнікаў атрымалі Падзякі старшыні аблвыканкама.
Памочнік Прэзідэнта Рэспублікі Беларусь – інспектар па Віцебскай вобласці Уладзімір Юргевіч у сваім прывітальным слове адзначыў арганізатарскія і творчыя здольнасці работнікаў установы культуры, якім пад сілу ўвасобіць у жыццё любы творчы праект на самым высокім, сусветным узроўні, і перадаў віншаванні і Падзякі ад кіраўніка Адміністрацыі Прэзідэнта Рэспублікі Беларусь Дзмітрыя Крутога галоўнаму гукарэжысёру службы гука-тэхнічнага комплексу Руслану Стаброўскаму і кіраўніку Заслужанага аматарскага калектыву Рэспублікі Беларусь узорнага харэаграфічнага ансамбля «Зорка» Наталлі Чарнюк.

Віншавальныя адрасы таксама даслалі Дзяржаўны сакратар Саюзнай дзяржавы Сяргей Глазьеў, міністр культуры Беларусі Руслан Чарнецкі. Нагрудным знакам Міністэрства культуры «За ўклад у развіццё культуры Беларусі» адзначаны намеснік генеральнага дырэктара па эканоміцы і фінансах Вольга Снытко і загадчык філіяла «Інтэрнэт-цэнтр» Вольга Сакалова.

У юбілейны вечар многія работнікі атрымалі заслужаныя ўзнагароды.

А пасля заканчэння ўрачыстай цырымоніі на сцэну выйшлі артысты і ў музычна-харэаграфічным пралогу прадставілі гісторыю развіцця Цэнтра культуры і стварэння творчых калектываў, якія сёння ведаюць далёка за межамі Віцебска.

У канцэрце таксама прынялі ўдзел уладальнік Гран-пры міжнароднага конкурсу выканаўцаў эстраднай песні «Віцебск-2004» Пётр Ялфімаў і лаўрэаты вакальных конкурсаў «Славянскага базару» розных гадоў Іван Зданюк, Арцём Скораля, Лера Бернатовіч. Госцем праграмы стаў заслужаны артыст Беларусі Руслан Алехна.
А ў фінале Глеб Лапіцкі разам з усімі калектывамі выканаў спецыяльна напісаную да юбілею песню «Найлепшы Цэнтр культуры».

"Віцебскія весці"