Больш за 700 навабранцаў 103-й Віцебскай асобнай гвардзейскай паветрана-дэсантнай брыгады прынялі прысягу на вернасць Радзіме
Больш як 700 навабранцаў 103-й Віцебскай асобнай гвардзейскай паветрана-дэсантнай брыгады прынялі прысягу на вернасць Радзіме.
Урачысты рытуал прайшоў на плошчы Перамогі з удзелам родных і блізкіх маладых дэсантнікаў.
З прыняццем прысягі хлопцаў павіншаваў намеснік камандуючага сіламі спецыяльных аперацый Узброеных Сілаў палкоўнік Аляксей Елфімаў. Ён пажадаў хлопцам працягваць традыцыі злучэння, а бацькам – цярпення, сыны хутка вернуцца дадому.
Старшыня Віцебскага гарадскога Савета дэпутатаў Вольга Іванова нагадала, што служба ў арміі – гэта не толькі сур'ёзнае выпрабаванне на сталасць, але і каштоўны жыццёвы досвед.
Ваенны камісар Віцебскай вобласці палкоўнік Сяргей Кунахавец запэўніў, што хлопцы набудуць сапраўдных сяброў, бо вайсковае сяброўства – назаўжды і наймацнейшае.
Захоўваць традыцыі, берагчы гісторыю пажадаў маладому папаўненню ветэран злучэння, камандзір 103-й паветрана-дэсантнай дывізіі генерал-маёр Аляксандр Скачкоў.
Вольга Дабрая, маці вайскоўца, які прымаў прысягу, падзякавала афіцэраў брыгады, якія дапамаглі сыну хутчэй прывыкнуць да няпростай армейскай службы, вывучыць асновы, і адзначыла, што за месяц ён прыкметна пасталеў.
Нечаканым момантам урачыстасці стала прапанова рукі і сэрца сваёй дзяўчыне Анастасіі гвардзейцам радавым Глебам Марозавым. Праз невялікі перыяд часу ён плануе перайсці на кантрактную службу, і тады маладыя згуляюць вяселле. Побач стаялі бацькі салдата – Міхаіл і Наталля Марозавы, хваляваліся і адчувалі гордасць за сына. Дарэчы, бацька Глеба з'яўляецца вайскоўцам брыгады.
На прысягу з'ехаліся больш за тры тысячы сваякоў і сяброў навабранцаў, якім было прадастаўлена першае дзённае звальненне.