З 11 мая па 15 чэрвеня 2026 года ўключна прадстаўнікі друкаваных і электронных СМІ, якія жадаюць асвятліць мерапрыемствы XXXV Міжнароднага фестывалю мастацтваў "Славянскі базар у Віцебску", могуць падаваць заяўкі на акрэдытацыю. Аб гэтым паведамілі БЕЛТА ў Міністэрстве інфармацыі.

Акрэдытацыя журналістаў СМІ, зарэгістраваных у Рэспубліцы Беларусь, супрацоўнікаў, якія забяспечваюць тэхнічнае суправаджэнне фестывалю, прадстаўнікоў інтэрнэт-рэсурсаў ажыццяўляецца Міністэрствам інфармацыі. Заяўка ў адпаведнасці з устаноўленай формай за подпісам кіраўніка юрыдычнай асобы, на якую ўскладзены функцыі рэдакцыі СМІ, і рэспубліканскага органа дзяржаўнага і мясцовага кіравання, дзяржаўнай арганізацыі (для прадстаўнікоў інтэрнэт-рэсурсу), накіроўваецца ў Міністэрства інфармацыі на электронную пошту ups@mininform.gov.by з паметкай "Акрэдытацыя на Славянскі базар - 2026".

У ёй у абавязковым парадку неабходна ўказаць звесткі пра журналіста, супрацоўніка, які забяспечвае тэхнічнае суправаджэнне фестывалю, прадстаўніка інтэрнэт-рэсурсу: прозвішча, імя, імя па бацьку (цалкам), псеўданім (пры наяўнасці), пасаду, пашпартныя даныя (уключаючы ідэнтыфікацыйны нумар, пры яго наяўнасці), дату (чысло, месяц, год) нараджэння, грамадзянства, кантактныя даныя (мабільны тэлефон, адрас электроннай пошты); аб рэдакцыі СМІ і інтэрнэт-рэсурсе: назва рэдакцыі, афіцыйная поўная назва СМІ, назва, даменнае імя інтэрнэт-рэсурсу, прозвішча, імя, імя па бацьку галоўнага рэдактара (кіраўніка), тэматыка, тыраж, перыядычнасць выхаду, час вяшчання, колькасць падпісчыкаў (для інтэрнэт-рэсурсаў), тэрыторыя распаўсюджвання, мяркуемы аб'ём публікацый, рэпартажаў аб фестывалі. Калі журналіст СМІ, які акрэдытуецца, прадстаўнік інтэрнэт-рэсурсу раней асвятляў фестываль, неабходна прадставіць (у электронным выглядзе) спасылкі на асноўныя публікацыі або тэле-, радыёсюжэты аб фестывалі.

Заяўкі на акрэдытацыю журналістаў замежных СМІ прымаюцца да 11 чэрвеня Міністэрствам замежных спраў Рэспублікі Беларусь у адпаведнасці з патрабаваннямі працэдуры часовай акрэдытацыі замежных журналістаў. Анкета даступна на сайце.

Акрэдытацыя ажыццяўляецца на час правядзення фестывалю.

"БелТА"