Арганізацыі і прадпрыемствы Пастаўскага раёна забяспечаны кадрамі амаль на 97 працэнтаў, паведамілі ў Пастаўскім райвыканкаме, у пасяджэнні якога сёння ўдзельнічае кіраўнік Адміністрацыі Прэзідэнта Ігар Сергяенка.

"У раёне праводзіцца пэўная работа па пытаннях забеспячэння галін эканомікі і сацыяльнай сферы кадрамі. Сёння забяспечанасць імі складае 96,9 працэнта, - сказаў на пасяджэнні намеснік старшыні Пастаўскага райвыканкама Станіслаў Чымбург. - Найбольш высокія паказчыкі ў сферы адукацыі, сістэме працы, занятасці і сацыяльнай абароны, а таксама ахове здароўя. Далей ідуць прадпрыемствы аграпрамысловага комплексу, прамысловыя арганізацыі. Найменшая забяспечанасць кадрамі ў раёне - 95 працэнтаў - назіраецца ў сферы культуры".

Сістэма мер па рэалізацыі дзяржаўнай кадравай палітыкі ў органах дзяржкіравання, арганізацыях галін эканомікі і сацыяльнай сферы Пастаўскага раёна на 2022-2025 гг. зацверджана рашэннем райвыканкама ад 18 сакавіка 2022 г. нумар 356. Пры прыняцці гэтых мер у рэгіёне ў першую чаргу стараюцца прыцягнуць маладых спецыялістаў, дапамагчы ім адаптавацца і замацавацца на месцах пасля заканчэння тэрміну абавязковай работы па размеркаванні.

Гэты працэс пачынаецца з прафарыентацыйнай работы ва ўстановах адукацыі, якая ў далейшым уплывае на заключэнне мэтавых дагавораў. Практыка мэтавай падрыхтоўкі ў галінах сельскай гаспадаркі, адукацыі, аховы здароўя і прамысловасці пашыраецца: калі ў 2022-м ва ўстановы вышэйшай і сярэдняй спецыяльнай адукацыі паступілі 14 выпускнікоў, то ў бягучым годзе - 30. Дадаткова 5 мэтавых дагавораў было заключана з выпускнікамі школ з іншых раёнаў і абласцей.

Сёння ў Паставах абмяркоўваюць рэалізацыю дзяржаўнай інфармацыйнай палітыкі і работу з маладымі спецыялістамі. У рабоце пасяджэння прымаюць удзел кіраўнік Адміністрацыі Прэзідэнта Ігар Сергяенка, памочнік Прэзідэнта - інспектар па Віцебскай вобласці Ігар Брыло, намеснік старшыні Віцебскага аблвыканкама Вячаслаў Дурноў. Запрошаны кіраўнікі прамысловых, сельскагаспадарчых прадпрыемстваў, дырэктары школ, старшыні сельсаветаў, кадравікі і работнікі ідэалагічных аддзелаў.

"БЕЛТА"