Надзвычайны і Паўнамоцны Пасол Індыі ў Беларусі сустрэўся з кіраўніцтвам Віцебскага аблвыканкама

У беларуска-індыйскім супрацоўніцтве адкрываюцца новыя гарызонты, заявіў журналістам Надзвычайны і Паўнамоцны Пасол Індыі ў Беларусі Саксена Панкадж, які сёння сустрэўся з кіраўніцтвам Віцебскага аблвыканкама.

Дыпламат у гэтыя дні наведвае Віцебскую вобласць: 8 лютага ён пабываў у Оршы, сёння знаходзіцца ў Віцебску, а заўтра плануе наведаць Наваполацк. Развітваючыся з журналістамі пасля сустрэчы з кіраўніцтвам аблвыканкама, Саксена Панкадж адзначыў, што супрацоўніцтва Індыі і Беларусі апошнім часам актывізуецца.

"У нас шмат кантактаў, у тым ліку ў абароннай, навукова-тэхнічнай і адукацыйнай сферах. Узаемадзеянне паляпшаецца, і гэта адкрывае новыя гарызонты, з'яўляюцца новыя перспектывы для супрацоўніцтва", - падкрэсліў дыпламат. "Я ўражаны візітам у рэгіён, які вядомы медыцынскім універсітэтам, Аршанскім льнокамбінатам, абутковай вытворчасцю, прыроднай прыгажосцю і прыязнасцю людзей. Я пабываў на льнокамбінаце, быў у езуіцкім калегіуме ў Оршы, у Віцебскім медыцынскім універсітэце, наведаў прадпрыемства "Марка" і паўсюль адчуваю цеплыню і зацікаўленасць у развіцці адносін з Індыяй, - падзяліўся ўражаннямі пасол. - Індыйскія студэнты ўжо даўно прыязджаюць у Віцебск вучыцца, а цяпер пачынае развівацца бізнес. Асноўныя напрамкі - гэта медыцынскія прэпараты, скураныя вырабы і лён. Узмацненне эканамічных сувязяў вядзе і да наладжвання культурнага ўзаемадзеяння".

Падчас афіцыйнай сустрэчы намеснік старшыні Віцебскага аблвыканкама Алег Мацкевіч падкрэсліў, што Віцебская вобласць і Індыя пачалі актыўна супрацоўнічаць у фармацэўтыцы - у Бешанковічах дзейнічае фармкампанія "Натывіта" (завод па вытворчасці прэпаратаў для лячэння злаякасных пухлін, а таксама шэрагу аутоіммунных і цяжкіх інфекцыйных захворванняў), у ліку інвестараў прадпрыемства індыйская фірма. Супрацоўніцтва ў гэтай сферы можна развіваць і на базе прадпрыемства "БелВітуніфарм". Яно ў асноўным вырабляе ветэрынарныя прэпараты, але ёсць магчымасць выпускаць і лекі для людзей. У ліку магчымых напрамкаў супрацоўніцтва была названа і перапрацоўка сельскагаспадарчай прадукцыі.

першую чаргу малака.

 "Індыя – адна з перадавых краін па вытворчасці малака, цалкам забяспечвае сябе і нават адпраўляе малочную прадукцыю на экспарт, - сказаў Саксена Панкадж. - Трэба шукаць кропкі сутыкнення і магчымасці, каб нашы малочныя прадпрыемствы супрацоўнічалі. Тым больш што ў Віцебскай вобласці вельмі выгаднае геаграфічнае становішча, яна мяжуе не толькі з Расіяй, але і з Літвой і Латвіяй. Можна ствараць кластары па экспарце ў суседнія краіны". Індыя таксама вядомая сваёй гарбарнай вытворчасцю і гатова падзяліцца вопытам работы ў гэтай сферы. Ужо дасягнута папярэдняя дамоўленасць, што генеральны дырэктар холдынгу "Марка" Мікалай Мартынаў у сакавіку наведае Індыю.

Акрамя таго, дыпламат распавёў аб ужо арганізаванай паездцы ў Індыю беларускіх мастакоў. Па выніках падарожжа плануецца арганізаваць выставу работ жывапісцаў. Пасольства зацікаўлена, каб экспазіцыя пабывала ў рэгіёнах. Таксама дыпламат прапанаваў кіраўніцтву горада і вобласці адсвяткаваць у Віцебску Міжнародны дзень ёгі. Мінулым летам падобнае мерапрыемства прайшло ў Мінску і сабрала вялікую колькасць удзельнікаў. Кіраўніцтва падтрымала ініцыятывы Саксены Панкаджа.

Пасля сустрэчы ў аблвыканкаме індыйскі дыпламат наведаў СЭЗ "Віцебск", на сёння таксама запланавана аглядная экскурсія па горадзе і знаёмства з галоўнымі славутасцямі абласнога цэнтра.

10 лютага пасол Індыі пабывае ў Наваполацку, дзе сустрэнецца са старшынёй гарвыканкама Дзмітрыем Дзямідавым і наведае Полацкі дзяржаўны ўніверсітэт.

Алена Ціханава - БЕЛТА.