Генадзь Грэбнеў падчас пасяджэння аблвыканкама заклікаў кіраўнікоў гарадоў і раёнаў наладзіць больш цесны дыялог з бізнесам

"Ёсць шмат рэзерваў у павышэнні эфектыўнасці нашай работы па развіцці прадпрымальніцтва. У некаторых раёнах не наладжаны дыялог улады і бізнесу, зносіны носяць эпізадычны характар. Да бізнесу павінен быць кардынальна новы падыход. Я патрабую ад кожнай службовай асобы сур'ёзнай прадметнай работы з прадпрымальнікамі і інвестарамі. Кіраўнікі ўсіх узроўняў павінны ў найкароткія тэрміны прымаць рашэнні ў падтрымку прадпрымальніцкага сектара эканомікі і спрыяць вызваленню дзелавой ініцыятывы", - запатрабаваў першы намеснік старшыні аблвыканкама. Цяпер у асноўным менавіта прыватныя прадпрыемствы нарошчваюць аб'ём вытворчасці і павялічваюць колькасць працаўнікоў. А гэта вельмі важна ва ўмовах скарачэння колькасці занятых на дзяржпрадпрыемствах.

"Наша з вамі задача - падтрымаць малы бізнес, які стварае новыя працоўныя месцы і тым самым уцягвае ў вытворчасць людзей", - падкрэсліў Генадзь Грэбнеў. Першы намеснік старшыні Віцебскага аблвыканкама заявіў, што задача ўлады не ў тым, каб напаўняць бюджэт за кошт павелічэння арэнднай платы.

"Бюджэт варта напаўняць за кошт падатку на прыбытак, падаходнага падатку з нармальнай зарплаты і г.д. А для гэтага трэба аказваць рэальную падтрымку прадпрыемствам, ведаць аб праблемах, з якімі яны сутыкаюцца, і разам іх вырашаць", - канстатаваў ён.

Прадстаўнікі бізнес-супольнасці прапанавалі актывізаваць работу саветаў па развіцці прадпрымальніцтва, якія былі створаны ў аблвыканкаме і райвыканкамах як дыялогавая пляцоўка ўлады і бізнесу. У першым паўгоддзі 2016 года ў рэгіёне пачалі дзейнасць 149 новых арганізацый малога і сярэдняга прадпрымальніцтва, адкрыта 12 вытворчасцей, створана 1 тыс. 150 новых працоўных месцаў. Усяго на тэрыторыі вобласці зарэгістравана больш за 9 тыс. юрыдычных асоб, якія адносяцца да малога і сярэдняга.