Галоўнае ўпраўленне жыллёва-камунальнай гаспадаркі: у Віцебскай вобласці з пачатку года ўвялі ў эксплуатацыю 38 станцый абезжалезвання вады

На Віцебшчыне з пачатку 2020 года ўведзена ў эксплуатацыю 38 станцый абезжалезвання вады, да канца года плануецца запусціць яшчэ пяць. Пра гэта паведаміў сёння на сесіі Віцебскага абласнога Савета дэпутатаў начальнік галоўнага ўпраўлення жыллёва-камунальнай гаспадаркі Віцебскага аблвыканкама Юрый Дзядзела.

Па словах Юрыя Дзядзелы, у 2019 годзе ў рэгіёне было запушчана 40 станцый абезжалезвання. Уся работа праводзіцца ў рамках рэалізацыі мерапрыемстваў падпраграмы "Чыстая вада" дзяржпраграмы "Камфортнае жыллё і спрыяльнае асяроддзе" на 2016-2020 гады. За мінулы перыяд забяспечанасць спажыўцоў чыстай вадой вырасла з 84,4% у 2016 годзе да 94,8% па выніках 2019-га.

Па стане на 1 кастрычніка на Віцебшчыне вадой нарматыўнай якасці забяспечаны 95,8% спажыўцоў. Цалкам забяспечаны спажыўцы ў буйных гарадах - Віцебску, Наваполацку, Полацку, Оршы. Пры гэтым устаноўленыя вытворчыя магутнасці дзеючых водазабораў і станцый водападрыхтоўкі гэтых гарадоў дастаткова вялікія і выкарыстоўваюцца ў сярэднім толькі да 40%.

Касаючыся работы па павышэнні якасці вады ў раёнах, Юрый Дзядзела адзначыў, што па выніках года ва ўсіх населеных пунктах Аршанскага раёна будзе забяспечана якаснае водазабеспячэнне. У наступныя гады плануецца паступова падцягнуць усе астатнія раёны.

БЕЛТА.