Пасяджэнне аблвыканкама: у 2022 годзе для ачысткі і паглыблення ракі Віцьба ў Віцебску плануюць набыць гідратэхнічную машыну
На гэтыя праблемы звярнуў увагу кіраўнік вобласці Мікалай Шарстнёў. Віцебшчына ў параўнанні з іншымі абласцямі найбольш забяспечаная воднымі рэсурсамі. Аднак невялікія вадаёмы ў рэгіёнах зараслі, асабліва гэта непрыгожа выглядае ў населеных пунктах, канстатаваў старшыня аблвыканкама.
— Мы са старшынёй гарвыканкама Мікалаем Арловым дамовіліся, што Віцебск купіць такую машыну для ачысткі ракі ад забруджванняў і біямасы. Магчыма, яна будзе працаваць па ўсёй вобласці, але адной машынай мы не вырашым праблему. Неабходна падключыцца раёнам і, па магчымасці аб'яднаўшыся, набыць некалькі машын, — сказаў Мікалай Шарстнёў.
Па словах старшыні абласнога камітэта прыродных рэсурсаў і аховы навакольнага асяроддзя Віктара Галанава, у апошнія гады назіраецца тэндэнцыя пагаршэння экалагічнага стану Віцьбы, якая адчувае ўсе цяжкасці гарадскога вадаёма, куды сыходзяць дажджавыя сцёкі з вуліц, плошчаў і жылых масіваў. Акрамя таго, у гарачы і засушлівы перыяд вада ў рацэ моцна праграваецца, у тым ліку дзякуючы слабаму цячэнню. Гэта спрыяе яе паступоваму зарастанню, зніжэнню эстэтычнай і рэкрэацыйнай каштоўнасці водатока.
Усяго на тэрыторыі вобласці працякае 3 вялікія (Заходняя Дзвіна, Дняпро, Бярэзіна), 2 сярэднія (Вілія, Друць) і 616 малых рэк.