Камітэт дзяржаўнай маёмасці: на аўкцыёне прададзены піянерскі лагер у Аршанскім раёне

У склад прададзенага незавершанага будаўніцтвам аб'екта Аршакрайвыканкама «Пашырэнне піянерскага лагера-базы «Лянок» уваходзіць гасцінічны корпус на 20 месцаў, жылы дом на 12 кватэр, клуб на 130 месцаў з рэстаранам на 100 месцаў, аздараўленчы корпус, прыёмны медыцынскі корпус, спальны корпус на 60 месцаў, спальны корпус на 40 месцаў, гаспадарчы корпус, а таксама абсталяванне.

Аб'екты жыллёвага будаўніцтва выстаўляліся на аўкцыён за 47300 руб., астатнія аб'екты нерухомасці і абсталяванне – за 60 базавых велічынь. Таксама пакупніку неабходна пакрыць затраты балансатрымальніку на афармленне дакументаў у суме 20666 руб.

Піянерскі лагер спрабавалі прадаць яшчэ з 2014 года. У выніку, на 14-м па ліку аўкцыёне, піянерскі лагер быў прададзены за 51672 руб. польскаму інвестару, які плануе зрабіць тут турыстычную базу. Па ўмовах аўкцыёну на гэта даецца 2 гады.

Дзіцячы сад, Полацкі раён, аг. Заазер'е, вул. Цэнтральная, 24

Таксама 30 верасня быў прададзены дзіцячы сад у в. Заазер'е Полацкага раёна. На гэты аб'ект прэтэндавала 2 пакупнікі. У выніку, дзіцячы сад на 8-м кроку аўкцыёну прададзены за 23099 руб. фізічнай асобе, жыхару Полацка. Новы ўладальнік плануе зрабіць тут аграсядзібу.