Камітэт па сельскай гаспадарцы і харчаванні: у Віцебскай вобласці масавая нарыхтоўка кармоў стартуе 1 чэрвеня

К уборцы траў першага ўкосу ў вобласці ўжо прыступілі Бешанковіцкі, Віцебскі, Дубровенскі, Аршанскі, Шаркаўшчынскі і Шумілінскі раёны. Астатнія рыхтуюцца да масавай корманарыхтоўкі, якая пачнецца ў паўночным рэгіёне 1 чэрвеня. Першым укосам трэба будзе ўбраць 197 тысяч гектараў траў, нарыхтаваць 381 тысячу тон кармавых адзінак травяных кармоў, або ў разліку на ўмоўную галаву жывёлы — не менш чым па 10 цэнтнераў кармавых адзінак.

— Тое, што будзе ўбрана першым укосам, — гэта трэць ад неабходнага. Стаіць задача з улікам паўтарагадовага запасу кармоў нарыхтаваць 30 цэнтнераў кармавых адзінак на ўмоўную галаву. Тут і другі ўкос пойдзе, і аднагадовыя культуры, і кукуруза. Мінімум, што мы павінны закласці ў засекі, каб перазімаваць з добрай аддачай, — 25 цэнтнераў на карову, — расказаў намеснік начальніка ўпраўлення земляробства, раслінаводства і кормавытворчасці камітэта па сельскай гаспадарцы і харчаванні Віцебскага аблвыканкама Юрый Раманаў.

Цяпер на поўначы краіны стаіць сухая надвор'е, а яравым пасевам і травам для росту так патрэбна вільгаць. Сіноптыкі прагназуюць цёплыя ночы, а аграрыі чакаюць яшчэ і дажджу, тады б і зеляніна дружна пайшла ў рост. Пакуль жа тыя, хто прыступіў да касавіцы, абкатваюць тэхніку і ўбіраюць па 10—20 гектараў — выключна на падкормку. 

У структуры шматгадовых траў на ворнай зямлі 81 працэнт займаюць бабовыя і бабова-злакавыя травазмяшчэнні. У чыстым выглядзе канюшына лугавая займае 42 тысячы гектараў, люцэрна — 4,7 тысячы. Падсейванне траў ідзе таксама пераважна бабовымі і бабова-злакавымі змесьсямі. 

— Навука патрабуе ўбраць травы першага ўкосу за 14—18 дзён, але жыццё паказвае, што гэта займае больш часу. То дажджы пойдуць, то зламаецца нешта, то перабоі з палівам, — заўважыў Юрый Раманаў.

Пакуль жа ў аграрыяў настрой на касавіцу аптымістычны: тэхніка падрыхтавана лепш за мінулагодні. Штодня ў гэтым працэсе задзейнічана каля 150 звёнаў. 

У гаспадарках рэгіёну 462 кормаўборачныя камбайны, 883 трактарныя касілкі, 520 грабаў трактарных, 508 прэс-падборшчыкаў для сена і саломы, 75 камбінаваных прэс-падборшчыкаў з абмоткай у стрэйч-плёнку.

— У асноўны

— Тэхніка ў нас айчынная, але вось усе камбінаваныя прэс-падборшчыкі замежнай вытворчасці. З вядомых прычын цэны на запчасткі падскочылі, ёсць праблемы са тэрмінамі пастаўкі. Дагаворы заключаны, усё аплачана, чакаем. Вось гэта і псуе нам агульную карціну, — завастрыў увагу намеснік старшыні камітэта па сельскай гаспадарцы і харчаванні Віцебскага аблвыканкама Мікалай Караткевіч.

Запчасткі некаторыя гаспадаркі закупляюць за свае або крэдытныя сродкі, хтосьці набывае з дапамогай субсідый раённага або абласнога бюджэтаў. Амаль такая ж карціна і з палівам. Усё ўпіраецца ў грошы.

Для бесперабойнай працы на палях вобласці трэба каля 5 тысяч чалавек. Па распараджэнні аблвыканкама на дапамогу аграрыям са старонніх арганізацый дадаткова прыцягнуць 350 механізатараў, у тым ліку з аўтамабілямі, трактарамі для адвозкі і трамбоўкі сіласнай масы.

— Спадзяемся, нішто не перашкодзіць нам падрыхтаваць кормаўборачную тэхніку да пачатку масавай касавіцы і прыступіць да работ на палях, — сказаў Мікалай Караткевіч.

"Сяльская газета".