Камітэт па працы, занятасці і сацыяльнай абароне: каля 3,7 тыс. школьнікаў і студэнтаў у Віцебскай вобласці працаўладкаваны з пачатку года
У вольны ад вучобы час і летні перыяд у паўночным рэгіёне плануюць працаўладкаваць мінімум 4 тыс. падлеткаў і моладзі, якая навучаецца ў каледжах і ВНУ. За студзень - ліпень часовую падпрацоўку пры дапамозе камітэта атрымалі ўжо каля 3,7 тыс. чалавек. "Дзеці займаюцца рамонтам і зборкай школьнай мэблі, добраўпарадкаваннем і азеляненнем тэрыторый, аднаўленнем бібліятэчных фондаў. Таксама ім прапануюць вырабляць швейныя вырабы, сувеніры, стэнды і іншыя рэчы, - растлумачылі ў камітэце. - Асноўнымі арганізатарамі часовай занятасці ў дадзеным выпадку выступаюць аддзелы па адукацыі гарадскіх і раённых выканкамаў і сярэднія спецыяльныя навучальныя ўстановы".
Школьнікі і студэнты могуць і наўпрост сустрэцца з наймальнікам і ўладкавацца на падпрацоўку. Даныя аб наяўных вакансіях апублікаваны на інфармацыйным партале дзяржаўнай службы занятасці. Пералік арганізацый, якія гатовыя працаваць з моладдзю, знаходзіцца ў раздзеле "Часовая занятасць". Толькі ў Віцебскай вобласці налічваецца каля 140 такіх прадпрыемстваў і ўстаноў. У жніўні - верасні яны прадаставяць больш за 1 тыс. працоўных месцаў. "З пачатку года каля 900 чалавек працаўладкавана ў арганізацыі, якія прымаюць на працу навучэнскую моладзь. У асноўным гэта лесгасы, сельскагаспадарчыя арганізацыі, ЖКГ, дзіцячыя аздараўленчыя лагеры", - удакладнілі ў камітэце.
Сярод відаў работ, куды запрашаюць юны працоўны дэсант, - праполка агародніны, пасадка лясных культур, добраўпарадкаванне і ўборка тэрыторый, палявыя, падсобныя, рамонтна-будаўнічыя і работы на збожжатаках. Па даных камітэта па працы, занятасці і сацыяльнай абароне, у сярэднім за два-чатыры тыдні працы летам падлеткі і студэнты могуць атрымаць ад Br480 да Br600 у залежнасці ад адпрацаванага часу.