Камітэт "Віцебскаблмаёмасць": у Браславе прададзены былы санаторый амаль за Br631 тыс.
Аб'ект упершыню выстаўляўся на продаж і аказаўся пакуль самым дарагім набыццём на таргах "Віцебскаблмаёмасць" у 2022 годзе. Пакупніком стала прыватная арганізацыя з Мінска. Па словах яе прадстаўніка, на дадзеным этапе прапрацоўваюцца магчымыя варыянты выкарыстання нерухомасці і арганізацыі прадпрымальніцкай дзейнасці. У ліку прыярытэтных напрамкаў разглядаецца стварэнне на яе базе аб'екта індустрыі адпачынку і аздараўлення, які будзе ўносіць уклад у развіццё турыстычнага патэнцыялу Браслаўшчыны.
Выручаныя на аўкцыёне сродкі паступяць у абласны бюджэт. У склад лота ўключана 12 будынкаў і збудаванняў рознага функцыянальнага прызначэння агульнай плошчай больш за 2,3 тыс. кв.м, а таксама аб'екты інфраструктуры. Нерухомасць размешчана ў межах горада ў сасновым бары на ўчастку зямлі памерам каля 3,7 га паміж азёрамі Дрывяты і Беража. Па ўмовах таргоў пераможца павінен кампенсаваць выдаткі на падрыхтоўку маёмасці да продажу на суму амаль Br5,5 тыс.
Для камітэта "Віцебскаблмаёмасць" пачатак лета атрымаўся гарачым. На папярэднім аўкцыёне кошт будынка гаражоў у Чашніках вырас амаль у 190 разоў і склаў каля Br6,1 тыс. Цікавасць да пабудовы плошчай 156 кв.м праявілі тры прэтэндэнты, а пераможцу ўдалося выявіць на 55-м кроку аўкцыёніста. Новым уласнікам стала прыватная кампанія з Віцебска, якая на базе маёмасці плануе арганізаваць пункт збору другасных матэрыяльных рэсурсаў.
Усяго з пачатку года на таргах камітэта "Віцебскаблмаёмасць" прададзена невыкарыстоўванай нерухомасці на агульную суму больш Br2,2 млн. У чэрвені запланавана больш за 70 таргоў, большасць з якіх з устанаўленнем пачатковай цаны ў 1БВ (Br32). Камітэт арганізуе тэматычныя аўкцыёны па рэалізацыі гандлёвай нерухомасці і аб'ектаў сістэмы адукацыі. Патэнцыйным пакупнікам прапануюцца былыя крамы ў сельскіх населеных пунктах Полацкага, Шумілінскага і Аршанскага раёнаў, якія раней
уваходзілі ў сістэму спажывецкай кааперацыі. Таксама плануецца ўцягнуць у абарот праз продаж на аўкцыёне каля 20 будынкаў былых школ і дзіцячых садоў.