Комплексныя планы развіцця Полацкага раёна і Наваполацка абмеркаваны ў Віцебскім аблвыканкаме
Пра гэта ішла размова на пасяджэнні аблвыканкама пры разглядзе комплексных планаў паскоранага развіцця Полацкага раёна і Наваполацка да 2020 года. Тэма дыферэнцыраванага ўздыму тэрыторый узнікла адносна нядаўна, але патрабуе пільнай увагі і эфектыўных рашэнняў ад усёй вертыкалі ўлады. Неабходнасць правядзення сістэмнай рэгіянальнай палітыкі Прэзідэнт Беларусі Аляксандр Лукашэнка актуалізаваў яшчэ раз пры разглядзе 22 сакавіка перспектыў Баранавіцкага раёна, даручыўшы выпрацаваць меры па паскораным развіцці 11 гарадоў і раёнаў з колькасцю насельніцтва звыш 80 тыс. чалавек. У гэты пералік разам з Аршанскім увайшлі таксама Полацкі раён і Наваполацк. Ва ўрадзе за віцебскія тэрыторыі адказвае віцэ-прэм'ер Ігар Ляшэнка.
Метадычнае суправаджэнне праектных работ
праводзіла Міністэрства эканомікі. Па словах першага намесніка міністра эканомікі Аляксандра Чарвякова, комплексныя планы паскоранага развіцця, дзе дакладна прапісаны праблемы, якія хвалююць насельніцтва, і шляхі іх вырашэння, павінны стаць дарожнай картаю для кіраўнікоў рознага ўзроўню.
З дабрабыту асобных раёнаў складаецца эканоміка вобласці і краіны ў цэлым, адзначыў старшыня аблвыканкама Мікалай Шарстнёў. Гэтым тлумачыцца яго патрабаванне больш глыбокай прапрацоўкі дакументаў з улікам заўваг, якія прагучалі ў ходзе абмеркавання. Праектаванне паскоранага развіцця тэрыторый прадугледжвае пошук нестандартных рашэнняў, генераванне арыгінальных ідэй і прарыўных праектаў, якія здольны паўплываць на дабрабыт жыхароў усіх рэгіёнаў Віцебшчыны.
— Кожны план павінен даваць дакладнае ўяўленне аб ключавых праблемах насельніцтва і мерах па іх вырашэнні, кропках
сацыяльна-эканамічнага росту, фінансавым забеспячэнні мерапрыемстваў, чаканых выніках, у тым ліку адлюстроўваць жаданую будучыню развіцця тэрыторый у наступныя гады, — падкрэсліў старшыня аблвыканкама.
ПОЛАЦК: ІНДУСТРЫЯЛЬНЫ ЎЗОР НА ГІСТАРЫЧНЫМ ФУНДАМЕНЦЕ
Для паскарэння развіцця Полацкі раён мае намер больш эфектыўна выкарыстоўваць наяўныя плюсы прамысловага рэгіёна і гісторыка-культурнага цэнтра з развітой турыстычнай галіной. На гэта і накіравана большасць мерапрыемстваў комплекснага плана, прызванага забяспечыць новы ўзровень тэхналагічных і вытворчых магчымасцей і, як вынік, павышэнне ўзроўню дабрабыту грамадзян.
Як адзначыў старшыня райвыканкама Мікалай Шаўчук, сярод канкурэнтных пераваг — наяўнасць буйных прамысловых прадпрыемстваў, падрыхтаваных пляцовак для размяшчэння новых вытворчасцей, у тым ліку на ўмовах СЭЗ «Віцебск», высокая інвестыцыйная актыўнасць у рэгіёне. Акрамя таго, створаны на базе ААТ «Полацк-Шкловалакно» кампазітны кластар з'яўляецца важным фактарам прыцягнення інвестараў, якія прыўнясуць новыя тэхналогіі, сучасныя мадэлі кіравання бізнесам, стымулюючы такім чынам паскоранае развіццё Полаччыны.
Мікалай Шаўчук асабліва вылучыў высокі турыстычны патэнцыял раёна, які складаецца з вялікай колькасці аб'ектаў гісторыка-культурнай спадчыны, разнастайных турыстычных маршрутаў і анімацыйных праграм.
— Комплексны план уключае 254 мерапрыемствы па прыярытэтных напрамках развіцця эканомікі рэгіёна, а менавіта: па мадэрнізацыі, павышэнні выкарыстання прамысловага, аграрнага і турыстычнага патэнцыялу, нарошчванні экспарту, актывізацыі прадпрымальніцкай ініцыятывы, — паведаміў старшыня райвыканкама. На іх рэалізацыю прадугледжваецца накіраваць амаль 340 млн рублёў.
Больш дынамічнаму развіццю рэгіёна будзе спрыяць, у прыватнасці, рэалізацыя амаль сотні ключавых інвестпраектаў. У іх ліку комплексная мадэрнізацыя ААТ «Полацк-Шкловалакно», укараненне тэхналогіі вытворчасці зварной рашотчатай насцілкі на заводзе тэхналагічных металканструкцый, абнаўленне малочнага камбіната, рэканструкцыю былых аб'ектаў аховы здароўя ў ахоўнай зоне пад размяшчэнне кадэцкага вучылішча, будаўніцтва і мадэрнізацыя малочнатаварных ферм. Для раскрыцця дзелавога патэнцыялу рэгіёна будзе ўдасканальвацца інфраструктура падтрымкі прадпрымальніцтва.
Дарэчы, малы і сярэдні бізнес фарміруе каля 50% даходнай часткі раённага бюджэту і 40% выручкі ад рэалізацыі прадукцыі, работ, паслуг. Але гэта не мяжа. Старшыня камітэта эканомікі аблвыканкама Анжаліка Нікіціна ўказала на адмоўную дынаміку колькасці суб'ектаў прадпрымальніцтва ў рэгіёне, а таксама заклікала ўсіх старшынь райвыканкамаў звярнуць увагу на эфектыўнасць працы недзяржаўнага сектара эканомікі, які з'яўляецца рэзервам павышэння ўстойлівасці рэгіянальнага развіцця.
НАВАПОЛАЦК: НОВЫЯ ГРАНІ ПРАМЫСЛОВАГА ГІГАНТА
Асноўныя рэсурсы паскоранага развіцця нафтаграда звязаны з мадэрнізацыяй і ўдасканаленнем нафтахімічнай вытворчасці. Як адзначыў старшыня Наваполацкага гарвыканкама Дзмітрый Дзямідаў, стратэгічная задача ў прамысловасці — фарміраванне ў горадзе ўмоў для стварэння вытворчасцей і прадпрыемстваў, якія спецыялізуюцца на выпуску высокатэхналагічнай хімічнай прадукцыі, арыентаванай на знешнія рынкі.
Адсюль і магчымыя кропкі росту — нароўні з далейшым развіццём горадаўтваральнага гіганта гэта прыцягненне буйных інвестараў і рэалізацыя інвестыцыйных праектаў у прыярытэтных напрамках. Сюды ж Дзмітрый Дзямідаў аднёс развіццё кадравага патэнцыялу, стварэнне ўмоў па замацаванні маладых спецыялістаў у горадзе, а таксама іх прыцягненне з іншых рэгіёнаў, стымуляванне дзелавой і прыватнай прадпрымальніцкай актыўнасці такімі эканамічнымі інструментамі, як прэферэнцыйны рэжым СЭЗ «Віцебск», нафтахімічны кластар, выкарыстанне фінансавых сродкаў інавацыйных фондаў і праектаў міжнароднай тэхнічнай дапамогі.
У кірунку ключавых праектаў 2020 года кіраўнік нафтаграда вылучыў стварэнне вытворчасці палімерна-мадыфікаванага бітуму (ТАА «Авестра Бітумныя Матэрыялы»), арганізацыю вытворчасцей малатонажнай хіміі, уключаючы аб'екты інжынернай і транспартнай інфраструктуры, на пляцоўцы завода бялкова-вітамінных канцэнтратаў, будаўніцтва дзіцячага тэхнапарка на базе палаца дзяцей і моладзі, дзіцячага садка ў 9-м мікрараёне, палігона цвёрдых бытавых адходаў, ачысных збудаванняў і сістэмы каналізацыі ў Баравусе.
— Развіццё інфраструктуры ў Баравусе дасць магчымасць будаўніцтва каля 400 дамоў сядзібнага тыпу, а гэта — важкі фактар павышэння камфортнасці пражывання, да таго ж загрузка нашай будаўнічай галіны, — дадаў Дзмітрый Дзямідаў. Разам з тым, для горада захоўваюць актуальнасць пытанні зніжэння залежнасці ад нафтахімічнай вытворчасці, паляпшэння экалагічнай абстаноўкі, развіцця транспартнага паведамлення. Усё гэта таксама знаходзіць адлюстраванне ў паўсядзённым парадку дня мясцовых кіраўнікоў.
СЯРГЕЙ АНТОНАЎ, «Віцебскія весці».