Кансалідаваць намаганні ўсіх суб'ектаў прафілактыкі: лейтматыў абласнога семінара з удзелам старшынь Саветаў дэпутатаў базавага і першаснага ўзроўню Віцебскай вобласці

З улікам негатыўнай тэндэнцыі па пажарах, якая склалася ў 2018 годзе і бягучым перыядзе, у тым ліку са смяротнымі выпадкамі ў Віцебскай вобласці, у зале пасяджэнняў абласнога Савета дэпутатаў праведзены тэматычны семінар. У мерапрыемстве прынялі ўдзел старшыні Саветаў дэпутатаў базавага і першаснага ўзроўню, кіраўнікі структурных падраздзяленняў аблвыканкама, пракуратуры, УУС, УМНС, рэгіянальныя сродкі масавай інфармацыі.

Выступаючы перад органамі мясцовага кіравання і самакіравання, зноў прызначаны начальнік УМНС, палкоўнік унутранай службы Сяргей Мялешкін агучыў праблемныя пытанні ў праводзімай рабоце на месцах па папярэджанні гібелі і траўматызму людзей пры ўзнікненні пажараў і іншых надзвычайных сітуацый, прычыны і ўмовы, якія ім спрыяюць. Пры гэтым прапанаваў стварыць у кожным сельскім Савеце так званыя «карты мясцовасці» з нанясеннем асабліва праблемных участкаў, абазначыўшы алгарытм узаемадзеяння мясцовай улады і адпаведных дзяржаўных органаў і арганізацый у гэтай сферы.

У сваім выступленні старшы памочнік пракурора вобласці Наталля Калпакова падтрымала ініцыятыву кіраўніка УМНС, агучыла выяўленыя пракурорамі парушэнні ў дзейнасці назіральных камісій, запатрабавала навядзення належнага парадку ў рабоце гэтых фарміраванняў на месцах, асабліва з катэгарызаванымі грамадзянамі. «Дзейнасць назіральных камісій павінна быць не фармальнай, яна павінна быць эфектыўнай», - сказала старшы памочнік пракурора вобласці. Пры гэтым арыентавала прысутных на максімальнае ўзаемадзеянне з Саветамі грамадскага пункта аховы правапарадку.

У цэлым абласны семінар паказаў, што падобнага роду сустрэчы, дзе прадастаўлена магчымасць дыялогу мясцовай улады і сілавога блока, дазваляюць прама абазначыць наяўныя праблемы і прапанаваць найбольш аптымальныя шляхі іх вырашэння.

Служба інфармацыі пракуратуры вобласці.