Марына Навіцкая ў межах ЕДІ наведала аршанскі швейны ўчастак Mark Formelle
18.06.2026
Начальнік галоўнага ўпраўлення ідэалагічнай работы і па справах моладзі Віцебскага аблвыканкама Марына Навіцкая ў межах ЕДІ наведала аршанскі швейны ўчастак аднаго з вядучых беларускіх вытворцаў бялізны і адзення Mark Formelle.
Звяртаючыся да калектыву, яна адзначыла, што лёгкая прамысловасць сёння ў прыярытэце.
– Мы з упэўненасцю і гонарам заяўляем, што Віцебская вобласць — гэта сэрца лёгкай прамысловасці, менавіта гэтая галіна шмат у чым напаўняе бюджэт. Ваша праца вельмі складаная. Сёння я размаўляла з адной з жанчын-швачак, пыталася пра ўмовы працы: якая змена, колькі часу даводзіцца знаходзіцца ў статычным напружанні, калі перапынкі. Безумоўна, гэта нялёгкая прафесія. Тое, што вы сёння з'яўляецеся майстрамі высокага класа, а прадукцыю прадпрыемства Mark Formelle любяць, цэняць і паважаюць — гэта выдатна. І тое, што склад не загружаны, таксама паказчык вашага поспеху.
Звяртаючыся да галоўнай тэмы ЕДІ, Марына Навіцкая нагадала, што мы знаходзімся напярэдадні смутнай даты — 85-годдзя з дня пачатку Вялікай Айчыннай вайны.
– Сёння мы як ніколі разумеем, наколькі няўстойлівы свет. Мы бачым, што адбываецца вакол нас. Нядаўняя трагедыя з гомельскімі хлопцамі-спартсменамі нагадвае: ніхто ні ад чаго не застрахаваны. Калі адматаць час назад, у далёкі 1941 год, то 22 чэрвеня быў днём, калі ў выпускнікоў школ заканчваўся навучальны працэс і праходзілі выпускныя балы. Шчаслівыя юнакі і дзяўчаты будавалі планы на будучыню, але для многіх з іх яна так і не наступіла. Па афіцыйнай статыстыцы, больш за 90% хлопцаў 1923 года нараджэння, якія на той момант завяршалі навучанне і пайшлі добраахвотнікамі ў армію, не вярнуліся з фронту. Сем'і недалічыліся сваіх сыноў, братоў і дзяцей. Мы, беларусы, страцілі велізарную колькасць людзей. Упэўнена, у кожнай сям'і, калі пагартаць сямейны альбом, знойдуцца сваякі, якія не вярнуліся з той вайны.
Спікер падкрэсліла, што гэтая памяць закладзена ўнутры нас, беларусаў, на генным узроўні.
– Літаральна сёння ў Полацку праходзяць пошукавыя работы, і ў гэты дзень на полацкай зямлі перапахаваюць астанкі 1200 воінаў. Да гэтага часу застаюцца неўстаноўленымі сотні тысяч імёнаў тых, хто ваяваў у гады Вялікай Айчыннай вайны. З 2021 года па ініцыятыве Генеральнай пракуратуры дзейнічае праграма, накіраваная на расследаванне генацыду беларускага народа. Раней частка гэтай інфармацыі хавалася. Мы ведалі пра Хатынь — вёску, якая была спалена жыўцом. Але толькі на тэрыторыі Віцебскай вобласці лёс спаленых вёсак паўтарылі больш за 5 000 населеных пунктаў, – канстатавала Марына Новіцкая. – У Віцебску ёсць памятны знак «Пяты полк» — на месцы, дзе размяшчаўся адзін з самых жудасных канцлагераў. Там было знішчана 80 000 чалавек — гэта практычна насельніцтва горада Оршы. Ніхто не шкадаваў ні маленькіх дзяцей, ні недужых старых — усе яны сталі ахвярамі гэтага генацыду. І мы ў імя нашых дзяцей, унукаў павінны ўсё зрабіць для таго, каб гэтую памяць захаваць.
Завяршаючы выступленне, начальнік галоўнага ўпраўлення ідэалагічнай работы і па справах моладзі пажадала, каб шмат дзесяцігоддзяў і стагоддзяў прадпрыемства, наша краіна квітнелі і людзі ўпэўнена глядзелі ў будучыню, радаваліся мірнаму небу.
– Таму ганарыцеся, шануйце тое, што маеце, і, самае галоўнае, даражыце роднымі і блізкімі, сваёй радзімай, – падсумавала Марына Новіцкая.