На «Славянскім базары» назвалі пераможцаў дзіцячага музычнага конкурсу
Мірас Нагашыбай з Казахстана заваяваў на конкурсе дыплом першай прэміі. Другую прэмію падзялілі расіянін Заур Барагуноў (Расія) і Мірэйль Маккей (Мальта). Дыплом трэцяй прэміі дастаўся Льву Смерціну з Малдовы і Мацею Бешанджыеву з Балгарыі.
Парламенцкі сход Саюза Беларусі і Расіі, пры падтрымцы якога праводзіцца міжнародны фестываль, заснаваў спецыяльныя прызы для ўдзельнікаў конкурсу. Гэтыя ўзнагароды ўручаны Амаліі Сухан і Зауру Барагунову.
Спецыяльная прэмія імя Ігара Лучанка за лепшае ўвасабленне нацыянальнай тэмы і высокае выканальніцкае майстэрства была ўручана Мірасу Нагашыбаю (Казахстан).
Старшыня журы конкурсу Яўгеній Алейнік адзначыў, што Мірас Нагашыбай стаў адзіным удзельнікам, які выбраў для свайго выступлення саўндтрэк з мультфільма на роднай для яго мове і выканаў яго на высокім узроўні. Ён таксама падкрэсліў важнасць для маладых выканаўцаў надаваць больш увагі нацыянальнай спадчыне ў іх творчасці.
Упершыню на конкурсе быў заснаваны спецыяльны прыз ад Выканаўчага камітэта СНД, які дастаўся самай юнай удзельніцы – 11-гадовай Мілане Ардакян з Арменіі. «Крыштальную нотку Садружнасці» яна атрымала з рук першага намесніка генеральнага сакратара СНД Ігара Петрышэнкі.
– Станоўчыя эмоцыі і настрой, якія пануюць тут, гавораць пра многае. Калі вы тут пасябравалі і пазнаёміліся, гэтая дружба захаваецца назаўжды. Гэты фестываль – знакавая падзея ў рамках культурнага супрацоўніцтва незалежных дзяржаў. Мы вырашылі падтрымаць самых маленькіх конкурсантаў, якія прыехалі са сваіх краін з бацькамі і педагогамі, і, вядома, хваляваліся. Дзякуй прафесійнаму і таленавітаму журы за працу, – адзначыў Ігар Петрышэнка. Ён выказаў упэўненасць, што творчы шлях Міланы Ардакян толькі пачынаецца.
Член журы міжнароднага конкурсу Яна Клявіня падрыхтавала спецыяльны прыз для ўдзельнікаў.
– Летась Калерыя з Латвіі атрымала спецыяльны прыз прэзідэнта Рэспублікі Беларусь Аляксандра Лукашэнкі «Славянская надзея». Даведаўшыся, што сёлета я буду ў журы XXIII Міжнароднага дзіцячага музычнага конкурсу, яна перадала мне свой падарунак. Калерыя напісала мноства песень для артыстаў, і, дарэчы, ваша беларуская выканаўца Аня Трубяцкая выконвае яе кампазіцыі. Я лічу, што кожнаму юнаму артысту неабходны свой рэпертуар і свая песня, – адзначыла Яна Клявіня і падарыла Зауру Барагунову сертыфікат на песню.
