Непрыбраныя двары і сырасць у кватэры. На што скардзіліся жыхары Віцебшчыны кіраўніку вобласці Мікалаю Шарстнёву на «прамой лініі»
Нядбайная праца жыллёва-камунальных службаў, праблемы водазабеспячэння і невыплаты заробку – вось асноўны круг пытанняў, з якімі жыхары Віцебшчыны звярнуліся да старшыні аблвыканкама Мікалая Шарснёва на «прамую лінію».
Большасць званкоў, што паступілі кіраўніку вобласці, тычыліся ЖКГ. Людзі скардзіліся, што ў галалёд не пасыпаюць пешаходныя дарожкі, як вынік – траўмы, пераломы рук і ног. Такая непрыемнасць адбылася з жыхаром Віцебска, які пражывае на вуліцы Воінаў-Інтэрнацыяналістаў, які паслізнуўся ў двары дома і цяпер вымушаны тры месяцы знаходзіцца на бальнічным.
Аналагічныя выпадкі адбыліся ў прыватным сектары абласнога цэнтра і Оршы. Зрэшты, такіх званкоў магло быць і больш. На жаль, адпаведныя службы не спраўляюцца са сваімі абавязкамі, што прыводзіць да сумных наступстваў.
Вядома, пасля звароту да старшыні аблвыканкама парадак па названых адрасах наведуць, але неабходна, падкрэсліў Мікалай Шарснёў, не дзейнічаць як пажарная служба, а наладзіць сістэмную працу.
Мікалай Шарснёў: Неабходна прыцягваць да адказнасці тых, хто не рэагуе на звароты людзей, якія патрабуюць ад камунальных службаў выканання элементарных абавязкаў
Да іх ліку адносіцца і ўборка пад'ездаў у шматкватэрных дамах, на яе адсутнасць таксама скардзіліся жыхары Віцебшчыны.
Са слязамі ў голасе звярнулася да Мікалая Шарснёва пенсіянерка, якая пражывае ў Шуміліна. Кватэра ў доме нумар 13 на вуліцы 40 год Кастрычніка стала для Валянціны Гардзееўны па-сапраўднаму няшчаснай. «Круглы год сцены плачуць, з-за сырасці немагчыма жыць», – распавяла жанчына.
Такая ж праблема ў іншых жыльцоў першага паверха, а камунальнікі разводзяць рукамі. Старшыня аблвыканкама даручыў мясцовым уладам разабрацца і вырашыць дадзеную праблему.
На вільготнасць у кватэры паскардзілася і жыхарка дома па вуліцы Чарапахава, 26, корпус 5 у Віцебску. Сям'я не карыстаецца пакоем, дзе на сценах цвіль, а работнікі домакіраўніцтва, куды пастаянна звяртаецца жанчына, нічога разумнага не адказваюць. Гэтае пытанне таксама пастаўлена на кантроль.
Па два кіламетры па ваду даводзіцца хадзіць жыхарам вёскі Капцэвічы Чашніцкага раёна. Гэты населены пункт знаходзіцца недалёка ад райцэнтра, на 50 двароў усяго дзве калонкі, людзям даўно абяцаюць вырашыць праблему з водазабеспячэннем.
Як высветлілася, ужо пабудавана новая свідравіна, пракладзена сетка, будзе ўзведзена станцыя абезжалезвання. Але спатрэбілася зварот да кіраўніка вобласці, каб адпаведныя службы паскорылі працу. Мясцовыя ўлады паабяцалі, што ўжо да сакавіка наступнага года жыхары Капцэвічаў будуць з вадой.
Старшыня аблвыканкама запатрабаваў на працягу некалькіх дзён знайсці магчымасць выплаціць зарплату работнікам саўгаса імя Машэрава Сенненскага раёна. Людзям запазычылі ўжо за два месяцы, па гэтым пытанні на «прамую лінію» паступіла два званкі.
Некаторыя звароты запатрабуюць дадатковага вывучэння
У прыватнасці, магчымасць пабудаваць новы магазін у аддаленым ад цэнтра раёне Оршы, прыватызаваць службовае жыллё, якое належыць Полацкаму райаграсэрвісу, захаваць і мадэрнізаваць аўтазаправачную станцыю ў раёне Ветрына Полацкага раёна.
Усяго паступіла 20 званкоў з розных рэгіёнаў вобласці. Усе звароты ўзяты на кантроль. Начальнік аддзела па рабоце са зваротамі грамадзян і юрыдычных асоб аблвыканкама Ілона Шульга адзначыла, што з 24 даручэнняў, дадзеных па выніках папярэдніх «прамых ліній», выкананы 20, чатыры патрабуюць часу. Два службовыя асобы прыцягнуты да адказнасці.
Някои званкі кіраўніку вобласці пачыналіся з падзякі за дапамогу ў вырашэнні тых ці іншых пытанняў. Да гэтых слоў гатовы далучыцца і жыхар Віцебска Уладзімір Ткачэнка. Ён у свой час звяртаўся да Мікалая Шарснёва з просьбай зрабіць прыпынак у цэнтры Барані. Цяпер да яго і радасці іншых людзей, якія жывуць у гэтай аддаленай частцы Віцебска, аўтобус спыняецца ў больш зручным месцы.
Дарэчы, некаторыя кіраўнікі прадпрыемстваў і арганізацый за дапамогу ў вырашэнні праблем грамадзян атрымліваюць падзячныя лісты старшыні аблвыканкама. Хацелася б толькі, каб іх было больш, чым нараканняў.