Старшыня абласнога Савета дэпутатаў уручыў падарункі шматдзетным сем'ям Лёзненскага раёна
Мерапрыемства адбылося ва ўтульнай зале Лёзненскага культурна-аздараўленчага цэнтра, дзе за кубкам гарбаты сабраліся кіраўніцтва раёна, бацькі, дзеці, прадстаўнікі ААТ «БелВітуніфарм» – арганізацыі, якая з'яўляецца кіруючай кампаніяй ААТ «Адаменкі», дзе сёння працуе большасць жыхароў аднайменнага мястэчка.
– У мяне самога дзве дачкі, адна з якіх ужо вучыцца ва ўніверсітэце, а другая, як і вашы дзеці, сёлета зноў ідзе ў школу, таму я разумею, колькі часу і сродкаў неабходна для таго, каб падрыхтаваць рабят да пачатку навучальнага года, – адзначыў Аляксандр Субоцін. – Спадзяюся, што падарункі і сертыфікаты, якія мы сёння ўручылі з ААТ «БелВітуніфармам» дапамогуць падрыхтаваць дзяцей да школы.
Таксама кіраўнік вобласці адзначыў, што ў летні час традыцыйна вядзецца маштабная падрыхтоўка ўстаноў адукацыі да пачатку навучальнага года ва ўсіх раёнах рэгіёна. Грашовыя сродкі на рамонт школ, абнаўленне навучальных класаў, купля тэхнікі і падтрымка сем'яў выдзяляюцца з рэспубліканскага, абласнога і раённага бюджэтаў, дапамагаюць і розныя арганізацыі.
– У нас у сям'і пяцёра дзяцей, трое – непаўналетнія, і дваіх з іх трэба сабраць у школу, таму для нас гэты працэс заўсёды фінансава затратнае мерапрыемства. Аднак дзякуючы такой падтрымцы, як сёння, мы ўжо амаль гатовыя да школы, засталося толькі дакупіць абутак і верхняе адзенне на восень, – расказала Надзея Кулакова. – Мы чакаем пачатку навучальнага года, і, вядома, будзем святкаваць 1 верасня.
Любоў і Уладзімір Бандаравы прыехалі на сустрэчу з трыма дзецьмі, малодшаму з якіх – Раману – толькі споўніўся месяц. Сужэнцы падзякавалі высокім гасцям за падтрымку і адзначылі, што дзеці з нецярпеннем чакаюць пачатку навучальнага года: старэйшая дачка Паліна – дзесяцікласніца – пераходзіць у новую школу, а сярэдні сын Віктар 1 верасня святкуе свой дзень нараджэння, пойдзе ў 4 клас.
– Вельмі хачу ў школу, ужо засумаваў па настаўніках і аднакласніках. У мяне ўжо сабраны партфель, там ляжаць сшыткі, кніжкі і пісьмовыя прыналежнасці, – сказаў Віктар Бандараў. – 1 верасня я прыйду ў школу як мае быць – у касцюме, з гальштукам і з кветкамі.
Па словах старшыні райвыканкама Івана Фёдарава, усе школы ў Лёзненскім раёне ўжо гатовыя да 1 верасня, усюды быў праведзены касметычны і капітальны рамонт. Таксама ўсім сем'ям, якія выхоўваюць школьнікаў, была выплачана заработная плата, каб бацькі змаглі сабраць дзяцей да новага навучальнага года.
– На сённяшні дзень у раёне 165 шматдзетных сем'яў, з іх у шасці выхоўваюць па пяць дзяцей, мы ў раёне надаём ім першачарговую ўвагу і аказваем дапамогу, – адзначыў Іван Фёдараў. – Так, напрыклад, у суботу, падчас святкавання Дня гарпасёлка, мы ўрачыста адкрылі новы 40-кватэрны дом і ўручылі ключы пяці шматдзетным сем'ям, якія цяпер будуць у ім жыць.
