Як у Віцебску прайшоў канцэрт адкрыцця 35-га Міжнароднага фестывалю сучаснай харэаграфіі
Гэта ў чарговы раз даказвае, што ў Віцебску любяць IFMC, чакаюць сустрэчы з калектывамі, якія мовай пластыкі гавораць пра вечныя ісціны, сучасны свет, радуюцца, сумуюць, разважаюць.
– Гэты фестываль стаў адной з самых прыгожых і яркіх жамчужын у фестывальным жыцці Віцебшчыны, усёй Беларусі. Удзельнікі, якія стаяць на гэтай сцэне, будуць дарыць нам сваю творчасць, дзяліцца ідэямі, думкамі, праслаўляць мастацтва. Хачу пажадаць усім незабыўных эмоцый, новых сустрэч і натхнення, – адзначыў на ўрачыстай цырымоніі адкрыцця форуму танца старшыня аблвыканкама Аляксандр Субоцін.
Гледачы змаглі пазнаёміцца з удзельнікамі міжнароднага конкурсу, якія выйшлі на паклон у прэлюдыі да канцэртнай праграмы, якую сёлета адкрываў Санкт-Пецярбургскі дзяржаўны акадэмічны тэатр балета імя Леаніда Якабсона. Праслаўленая трупа прывезла ў Віцебск аднаактавы балет «Радэн», які складаецца з мініяцюр, натхнёных творчасцю французскага скульптара-імпресіяніста Агюста Радэна, і яркую, свавольную пастаноўку на музыку Радзівона Шчадрына – «Свавольныя частушкі».
