Комплекс мер па развіцці Аршанскага раёна будзе дапрацаваны

Праекты комплекснай праграмы развіцця Аршанскага раёна на перыяд да 2023 года і ўказа "Аб дадатковых мерах па стварэнні ўмоў для паскоранага развіцця Аршанскага раёна Віцебскай вобласці" будуць дапрацаваны, паведамілі ў прэс-службе ўрада па выніках пасяджэння Прэзідыума Савета Міністраў.

Адпаведныя раздзелы праграмы і праекты прайшлі абарону ў намеснікаў прэм'ер-міністра з удзелам кіраўнікоў рэспубліканскіх органаў дзяржаўнага кіравання, Віцебскага аблвыканкама і Аршанскага райвыканкама.

Падчас работы над імі некаторыя моманты удакладнены, але засталіся пытанні, якія патрабуюць абмеркавання. Па словах прэм'ер-міністра Сяргея Румаса, комплекс мер, які ўключае больш за пяцьсот мерапрыемстваў, мае патрэбу ў істотнай дапрацоўцы. "Яго трэба структураваць па органах дзяржаўнага кіравання, мэтах, задачах, вызначыць адзіную сістэму індыкатараў і параметраў дасягнення мэт у залежнасці ад відаў дзейнасці. Таксама неабходна на аснове комплексу мер, зацверджанага на рэспубліканскім узроўні, разгарнуць мерапрыемствы ў галіновых і рэгіянальных планах, іх канкрэтызаваць, каб забяспечыць неабходны вынік", - падкрэсліў Сяргей Румас.

Прэм'ер-міністр лічыць, што персанальная адказнасць за выкананне праграмы і комплексу мер павінна ўскладацца на старшынь Віцебскага аблвыканкама, Аршанскага райвыканкама, кіраўнікоў органаў дзяржаўнага кіравання, а маніторынг праграмы і комплексу мер - на Міністэрства эканомікі. Сяргей Румас даручыў дапрацаваць у найкароткія тэрміны праекты і унесці іх у Адміністрацыю Прэзідэнта да 16 лістапада.

БЕЛТА.