Канцэрт вядомых выпускнікоў і ра́яль у падарунак. Віцебскі музычны каледж імя І. Салерцінскага адзначыў сваё 100-годдзе
Ключ ад музычнага інструмента дырэктару каледжа Анатолю Грэцкаму ўручыў на ўрачыстым вечары ў гонар знакавай даты старшыня абласнога Савета дэпутатаў Уладзімір Церанцьеў.
Права першым сесці за новы рояль, набыты за бюджэтныя сродкі, было прадастаўлена былому выпускніку каледжа, лаўрэату шматлікіх міжнародных конкурсаў, доктару мастацтвазнаўства пры Каралеўскай музычнай кансерваторыі ў Канадзе Андрэю Мануліку.
Музыка невыпадкова выбраў твор Пятра Чайкоўскага «Снежань» з цыкла «Часы года», бо менавіта ў гэтым месяцы яго альма-матар арганізавала ўрачыстасці з нагоды векавога юбілею.
Народная кансерваторыя ў Віцебску была адкрыта ў кастрычніку 1918 года і стала адной з першых у краіне. На пасаду кіраўніка навучальнай установы быў запрошаны з Санкт-Пецярбурга вучань вядомых расійскіх кампазітараў М. Рымскага-Корсакава і М. Чэрапніна Мікалай Малька. Ён таксама стаў галоўным дырыжорам Віцебскага дзяржаўнага сімфанічнага аркестра. Дарэчы, гэты калектыў сто гадоў таму даў вялікі канцэрт у гонар адкрыцця кансерваторыі.
Узнаўлены ў 2012 годзе аркестр адкрыў і юбілейную праграму, выканаўшы сумесна з духавым калектывам каледжа сімвалічную кампазіцыю Свірыдава «Час, наперад!».
Яна прагучала як прысвячэнне заснавальнікам адной са старэйшых устаноў музычнай адукацыі, педагогам, якія выхавалі сапраўдных прафесіяналаў, настаўнікам цяперашніх вучняў.
У гісторыю каледжа ўпісалі свае імёны выпускнікі Петраградскай кансерваторыі, якія прыехалі ў Віцебск, Э. Бай, У. Мерыін, Д. Гершэвіч і Э. Завелеў, М. Дубасаў і іншыя. Велізарны ўклад у развіццё беларускай музычнай педагогікі і культуры ўнеслі заслужаныя настаўнікі рэспублікі Я. Палішчук, Я. Нікіцін, заслужаная артыстка Беларусі Т. Шафранова.
Навучальная ўстанова перажыла некалькі рэарганізацый, прайшоўшы этапы 3-ступеністай музычнай школы, музычнага тэхнікума, вучэльні. У 1992 годзе тагачаснаму музвучэльні прысвоена імя ўраджэнца Віцебска выдатнага музычнага дзеяча ХХ стагоддзя Івана Салерцінскага. А са студзеня 2010-га яно атрымала статус каледжа.
За ўсю гісторыю свайго існавання са сцен навучальнай установы выйшла больш за пяць тысяч спецыялістаў. Многія выпускнікі сталі салістамі і кіраўнікамі вядомых аркестравых і харавых калектываў, высокакваліфікаванымі выкладчыкамі ў вышэйшых і сярэдніх навучальных установах Беларусі, блізкага і далёкага замежжа.
Сярод іх народны артыст рэспублікі, прафесар, мастацкі кіраўнік і галоўны дырыжор Нацыянальнага акадэмічнага аркестра імя І. Жыновіча Міхаіл Казінец, салістка Марыінскага тэатра Санкт-Пецярбурга Вольга Легкава, салістка Нацыянальнага акадэмічнага аркестра народных інструментаў імя Н. Осипова, выкладчык Расійскай акадэміі музыкі імя Гнесіных, якую называюць першай домрай Расіі Кацярына Мачалава.
Усе яны прыехалі ў Віцебск, каб адзначыць юбілей альма-матар і выступіць на роднай сцэне, якая адкрыла ім шлях у вялікі свет музычнага мастацтва.
Канцэрт знакамітых выпускнікоў стаў падарункам навучальнай установе, дзе сёння навучаецца не менш таленавітая моладзь. Так, за апошнія два гады больш за 70 навучэнцаў каледжа станавіліся лаўрэатамі і дыпламантамі розных творчых конкурсаў. Тры аркстравыя калектывы маюць ганаровае званне народнага.
Увесь гэты год праходзіў у каледжы пад знакам юбілею – праводзіліся сустрэчы з выпускнікамі розных гадоў, майстар-класы, музычныя гасцінцы і справаздачныя канцэрты творчых калектываў.
Фінальным акордам стаў святочны канцэрт, падчас якога ўшаноўвалі ветэранаў, лепшых педагогаў, уручалі падарункі. Было зачытана прывітанне, падпісанае старшынёй аблвыканкама Мікалаем Шарснёвым і старшынёй аблсавета дэпутатаў Уладзімірам Церанцьевым.
Каледж і яго дырэктар Анатоль Грэцкі атрымалі ганаровыя граматы аблвыканкама. Нагрудным знакам Міністэрства культуры Рэспублікі Беларусь за ўклад у развіццё нацыянальнай культуры ўзнагароджаны выкладчыкі Аліна Быкава і Ігар Кошалеў. Шэраг педагогаў адзначаны Міністэрствам культуры, абласным саветам дэпутатаў, упраўленнем культуры аблвыканкама, Віцебскім гарвыканкамам.
Пасляслоўем да ўрачыстасцей стане выступленне ў філармоніі 13 снежня Нацыянальнага акадэмічнага аркестра імя І. Жыновіча – гэта канцэрт-падарунак ад выпускніка Міхаіла Козінцы.