Прэзідэнт Беларусі Аляксандр Лукашэнка ўручыў дзяржаўныя ўзнагароды лепшым работнікам сістэмы адукацыі

Прэзідэнт Беларусі Аляксандр Лукашэнка ўручыў дзяржаўныя ўзнагароды лепшым работнікам сістэмы адукацыі. За шматгадовую плённую працу, значны асабісты ўклад у развіццё сістэмы адукацыі, навучанне і выхаванне падрастаючага пакалення, арганізацыю аздараўлення дзяцей, падрыхтоўку навукова-педагагічных кадраў і высокакваліфікаваных спецыялістаў высокіх узнагарод і ганаровых званняў удастоены 37 педагогаў з розных рэгіёнаў Беларусі.

Прэзідэнт адзначыў, што сёння запрошаны лепшыя работнікі сістэмы адукацыі, якія фарміруюць маральную і духоўную аснову маладога пакалення беларусаў. Многія былі ўдзельнікамі Рэспубліканскага педагагічнага савета. «Прывіваючы з дзяцінства любоў да сапраўдных каштоўнасцей, перадаючы свае веды, вы спрыяеце станаўленню адукаванай, культурнай і працавітай беларускай нацыі, – сказаў Аляксандр Лукашэнка. – Уручэнне дзяржаўных узнагарод напярэдадні Дня ведаў – не толькі прызнанне вашых асабістых заслуг, але і знак глыбокай павагі да высакароднай прафесіі настаўніка».

Кіраўнік дзяржавы звярнуў увагу на важнасць добрага выхавання дзяцей з першых гадоў жыцця. Менавіта таму велізарнае значэнне набывае якасць работы дашкольных устаноў. «Яна ў першую чаргу залежыць ад выхавальнікаў, ад іх душэўнай цеплыні і ўмення падабраць ключык да кожнага маленькага. Такія людзі заслугоўваюць усялякай падтрымкі і заахвочвання», – падкрэсліў Прэзідэнт.

Важную ролю адыгрывае прафесійна-тэхнічная адукацыя, у развіцці якой Беларусь дасягнула нямала поспехаў. Запатрабаванасць яе ў краіне і ў замежных партнёраў з'яўляецца своеасаблівым знакам якасці, адзначыў Аляксандр Лукашэнка.

«За падрыхтоўку кваліфікаваных спецыялістаў для галін эканомікі адказвае перш за ўсё вышэйшая школа. Многія ВНУ паспяхова ўкараняюць інавацыйныя метады навучання і становяцца сапраўднымі цэнтрамі прасоўвання навукова-тэхнічнага прагрэсу як у рэгіёнах, так і ў сталіцы нашай Беларусі», – канстатаваў Аляксандр Лукашэнка.

«Педагогі не толькі прыўносяць у жыццё нашых дзяцей мноства новых і важных ведаў. Яны беражліва клапоцяцца пра падрастаючае пакаленне краіны, выхоўваючы ў іх павагу, дружбу і патрыятызм», – сказаў кіраўнік дзяржавы. Ён павіншаваў педагогаў з заслужанымі ўзнагародамі і пажадаў ім доўгіх гадоў жыцця, шчасця, дабрабыту і дасягненняў у нялёгкай, але ганаровай працы.

Паводле ўсталяванай традыцыі, яшчэ адной знакавай падзеяй для ўзнагароджаных стала экскурсія па адным з сучасных сімвалаў беларускай дзяржаўнасці і суверэнітэту – Палацы Незалежнасці. Педагогі наведалі найбольш знакавыя месцы, дзе прымаюцца важныя для краіны рашэнні, праводзяцца міжнародныя сустрэчы і саміты.

Сярод удастоеных высокіх узнагарод і прадстаўнікі Прыдзвінскага краю.

Падзяка Прэзідэнта аб'яўлена выхавальніцы санаторных ясляў-сада №72 Віцебска Святлане Крэпскай.

Медалём «За працоўныя заслугі» ўзнагароджаны начальнік аддзела адукацыі, спорту і турызму Браслаўскага райвыканкама Іван Абаровіч, настаўнік матэматыкі ДУА «Сярэдняя школа №20 г. Орша» Валерый Герасімаў.

Званнем «Заслужаны работнік адукацыі Рэспублікі Беларусь» удастоены рэктар Полацкага дзяржаўнага ўніверсітэта Дзмітрый Лазоўскі, дырэктар Віцебскага дзяржаўнага тэхнічнага каледжа Аляксандр Ласякін.

Акрамя таго, у адпаведнасці з Указам Прэзідэнта Рэспублікі Беларусь ад 25 жніўня 2017 года №303 за шматгадовую плённую працу, узорнае выкананне службовых абавязкаў, значны асабісты ўклад у вытворчасць звышцяжкай кар'ернай тэхнікі, развіццё аптычнага прыборабудавання, лёгкай прамысловасці, чыгуначнага транспарту і сельскай гаспадаркі, значныя дасягненні ў галіне аховы здароўя, бытавога абслугоўвання насельніцтва, нацыянальнай журналістыкі, навуковай дзейнасці, адукацыі, культуры і мастацтва дзяржаўнымі ўзнагародамі ўдастоены прадстаўнікі розных галін.

У прыватнасці, медалём «За працоўныя заслугі» ўзнагароджаны:

начальнік упраўлення сацыяльнай падтрымкі насельніцтва і стацыянарных устаноў камітэта па працы, занятасці і сацыяльнай абароне Віцебскага аблвыканкама Вера Астапенка;

старшы памочнік пракурора Віцебскай вобласці па наглядзе за выкананнем заканадаўства аб дзяржаўнай бяспецы, старшы саветнік юстыцыі Уладзімір Белавус;

загадчык кафедры анкалогіі з курсамі прамянёвай дыягностыкі і прамянёвай тэрапіі факультэта павышэння кваліфікацыі і перападрыхтоўкі кадраў Віцебскага дзяржаўнага медыцынскага ўніверсітэта Мікалай Луд;

генеральны дырэктар РВУП «Аршанскі льнокамбінат» Уладзімір Несцярэнка.

Медалём Францыска Скарыны ўзнагароджаны прарэктар па вучэбнай рабоце Полацкага дзяржаўнага ўніверсітэта Дзяніс Дук.

БЕЛТА. Фота з інтэрнэт-рэсурсу Прэзідэнта Рэспублікі Беларусь.