Рэгіянальныя адборы на конкурсы «Славянскага базару» пройдуць з 2 па 13 снежня
З 2 снежня 2019 года пачнецца першы этап нацыянальнага адбору да міжнародных конкурсаў. Стартавай пляцоўкай рэгіянальных адборачных тураў стане г. Мінск. Працягнуць эстафету рэгіянальных тураў гг. Гомель (05.12.2019), Магілёў, Віцебск (06.12.2019), г. Гродна (10.12.2019) і Мінская вобласць (12.12.2019). Завершыцца першы этап адборачных тураў 13.12.2019 у Брэсцкай вобласці.
У адпаведнасці з умовамі конкурсу ў адборачным туры да дзіцячага музычнага конкурсу прымаюць удзел выканаўцы, якія з'яўляюцца грамадзянамі Рэспублікі Беларусь, ва ўзросце ад 8 да 14 гадоў уключна на апошні дзень тэрміну правядзення фестывалю (арыентыровачна 20.07.2020), якія маюць вопыт канцэртных выступленняў, заявілі пра сябе сваімі поспехамі ў міжнародных або рэспубліканскіх музычных конкурсах і фестывалях.
У адборачным туры да конкурсу выканаўцаў эстраднай песні прымаюць удзел выканаўцы, якія з'яўляюцца грамадзянамі Рэспублікі Беларусь, ва ўзросце ад 18 да 31 года ўключна на апошні дзень тэрміну правядзення фестывалю (арыентыровачна 20.07.2020), якія маюць вопыт канцэртных выступленняў, заявілі пра сябе сваімі поспехамі ў міжнародных або рэспубліканскіх музычных конкурсах і фестывалях.
Для ўдзелу ў конкурсных праслухоўваннях неабходна прадставіць па дзве кампазіцыі:
удзельнікам дзіцячага музычнага конкурсу:
эстрадная песня беларускага аўтара на беларускай мове;
эстрадная песня па выбары ўдзельніка, якая найбольш ярка адлюстроўвае яго выканаўчае майстэрства і артыстычныя здольнасці;
удзельнікам конкурсу выканаўцаў эстраднай песні:
эстрадную песню кампазітара славянскай краіны на адной са славянскіх моў;
папулярную кампазіцыю на замежнай мове («сусветны хіт»).
Па выніках рэгіянальных адбораў адбіраецца да 5 удзельнікаў ад кожнай вобласці і г. Мінска для ўдзелу ў другім этапе адборачных тураў.
- ГРАФІК правядзення рэгіянальных адборачных тураў
- ІНСТРУКЦЫЯ аб правядзенні адборачных тураў да Міжнароднага конкурсу выканаўцаў эстраднай песні «Віцебск» і Міжнароднага дзіцячага музычнага конкурсу «Віцебск»