Скульптурны знак “Буквар” адкрылі на Дзень пісьменства ў Гарадку

Абноўленым сустрэў Вераніцынскі сквер у Гарадку ўдзельнікаў юбілейнага Дня пісьменства. З удзелам намесніка прэм’ер-міністра Беларусі Ігара Петрышэнкі, міністра інфармацыі Уладзіміра Перцова, старшыні Віцебскага аблвыканкама Аляксандра Субоціна, старшыні Гарадоцкага райвыканкама Ірыны Паляковай, шырокім прадстаўніцтвам дыпламатаў з Расіі, Сірыі, Палесціны, Зімбабвэ, Азербайджана, Арменіі тут адкрылі скульптурную кампазіцыю «Буквар».

Аўтарам працы стаў студэнт Беларускай акадэміі мастацтваў Ігар Сілка:

- Штуршком да стварэння эскіза паслужыў першы ў свеце буквар, 405 гадоў таму выдадзены ў друкарні Віленскага Свята‑Духава праваслаўнага брацтва. На думку гісторыкаў, гэтая кніга мае і беларускія карані. Убачыўшы шрыфты арыгінальнага буквара, я вырашыў стылізаваць іх, склаўшы ў незвычайную кампазіцыю, якая цікава выглядае з усіх ракурсаў. 

Яшчэ адна навінка Вераніцынскага сквера — «Дрэва беларускага пісьменства». У «цуду» з нержавеючай сталі вышынёй больш за два з паловай метры замест ствала — кнігі. На пярэдняй частцы скульптуры змешчаны зварот з выявай лагатыпа свята і надпісам «Вераніцынскі сквер». Стваральнік кампазіцыі, дырэктар глубокскага прадпрыемства «У ажуры» Юрый Татарыновіч падлічвае:

- Усяго 19 кніг яркіх, таленавітых аўтараў, якія праславілі Гарадоцкі край. Сімвалічна, што апошняя з іх выканана ў выглядзе кветкі. Гэта знак: пераемнасць пакаленняў, творчасць і жыццё працягваюцца!

 

"СБ"