Створаны віцебскім скульптарам помнік ахвярам генацыду ўсталююць у Сянне

"Мадэль культурнага аб'екта ўжо гатовая і зацверджана кіраўніцтвам Сенненскага раёна, з'явіцца яна ў райцэнтры напярэдадні дня горада, які сёлета прыпадае на 10 чэрвеня", - распавёў Іван Казак. Памятны знак ахвярам генацыду ўяўляе сабой камбінацыю з некалькіх знакавых зон. На пліце справа адлюстраваны населены пункт - з драўлянымі дамамі, што навіслі над імі драцянымі агароджамі. Сярэдзіна кампазіцыі ўяўляе сабой стромкі спуск, па якім крочаць людзі. Яны ідуць на расстрэл, і ў кожнай постаці бачна асуджанасць і разуменне таго, што гэты спуск вядзе ў магілу і зваротнага шляху няма. Злева на памятным знаку адлюстравана частка звычайнага дома - фрагмент даху, акно са свечкай і перад ім зэдлік, на якім, згорбіўшыся, сядзіць старая маці, што аплаквае дзяцей і знаёмых, якіх забралі на верную смерць фашысты. У кутку над акном будзе размяшчацца абраз Казанскай Божай Маці - як сімвал дапамогі Бога ўсім маці, якія страцілі на вайне блізкіх людзей.

Памятны знак плануецца выканаць з кампазітных матэрыялаў. Ён будзе складаць каля 2,7 м у вышыню і больш за 3 м у шырыню. Гэта будзе першы аб'ект, які знаёміць наведвальнікаў з тэматычнай экспазіцыяй у раённым Доме рамёстваў.

Выстава на тэму трагедыі генацыду жыхароў Сенненскага раёна размесціцца ў падвальным памяшканні будынка, дзе ў канцы XIX - пачатку XX стагоддзяў быў спіртавы склад. У час Вялікай Айчыннай вайны фашысты зладзілі тут турму для ваеннапалонных і тых, каго затрымлівалі за сувязь з партызанамі. На верхніх паверхах склада акупанты арганізавалі дыверсійную школу, дзе рыхтавалі ў асноўным з жанчын і падлеткаў дыверсантаў для працы ў партызанскіх атрадах.

Цяпер на цокальным паверсе, дзе нядаўна размяшчалася крама, вядуцца работы па расчыстцы сцен, столі і падлогі – да аўтэнтычнай муроўкі з чырвонай цэглы. Паводле водгукаў работнікаў культуры, старадаўняя цэгла вельмі трывалая і выдатна захавалася, але трэба будзе правесці яе кансервацыю, каб не асыпалася.

У Дзень горада тут адкрыюць экспазіцыю, якая складаецца з дзвюх зон – гістарычнай і інтэрактыўнай. У першай створаць фрагмент турмы, у другой, асучасненай, будуць праводзіць заняткі са школьнікамі. Выставу дапоўняць рэплікі фотадакументаў, архіўныя здымкі, у тым ліку разбуранага горада і загінулых, прымусова вывезеных у рабства сенненцаў, а таксама некаторыя асабістыя рэчы расстраляных. Дырэктар Сенненскага гісторыка-краязнаўчага музея Іва Шубко расказала, што да вайны ў райцэнтры размяшчаліся касцёл, два праваслаўныя храмы і шэсць сінагог. У канцы снежня 1941 года тут расстралялі 965 чалавек – вязняў мясцовага гета.

БЕЛТА.