Сталі вядомыя падрабязнасці новых праектаў на "Славянскім базары"

У Летнім амфітэатры сёння прайшла прэс-канферэнцыя арганізатараў маючага адбыцца юбілейнага міжнароднага фестывалю мастацтваў "Славянскі базар у Віцебску".

Генеральны дырэктар цэнтра культуры "Віцебск", дырэктар фестывалю мастацтваў Глеб Лапіцкі распавёў, што заяўленыя раней праекты, конкурсы і канцэрты адбудуцца. Больш за 30 удзельнікаў плануюць прыняць удзел ва ўваходным і дзіцячым конкурсах. За актуальнай афішай канцэртаў са спісам удзельнікаў можна сачыць на афіцыйным сайце фестывалю.

Начальнік упраўлення культуры Віцебскага аблвыканкама Пётр Падгурскі адзначыў, што атмасферу фестывалю будуць ствараць і нацыянальная культура з раёнаў вобласці. "Усе рэгіёны будуць удзельнічаць у праектах на многіх пляцоўках фестывалю. Філармонія, абласны цэнтр народнай творчасці, музеі падрыхтавалі шыкоўную праграму", - падкрэсліў ён.

Па традыцыі будзе працаваць кірмаш у Задзвінне, "Горад майстроў" па вул. Пушкіна, Суворава. Работы мастакоў, рамеснікаў і народных майстроў насыцяць вуліцы фестывальнага горада. У абласным краязнаўчым музеі падчас "Славянскага базару" адкрыюцца пяць выстаў. Публіцы прадставяць філатэлістычныя экспанаты з 80 калекцый збіральнікаў розных краін свету. З Расіі прывязуць выставу хахломы і шыцця. У дні форуму музей будзе працаваць даўжэй звычайнага.

Дырэктар абласнога метадычнага цэнтра народнай творчасці Кацярына Лабука расказала, што ў горадзе пройдзе конкурс мажарэтак і барабаншчыц. На пл. Свабоды арганізуюць конкурс традыцыйнага побытавага танца "Танчым разам", які збярэ каля 500 удзельнікаў. "З імі хочам правесці флэшмоб: разам з танцавальнымі калектывамі ў нацыянальных касцюмах зрабіць вялікі карагод, а затым прайсціся па вуліцах горада. Бо да нас прыедуць канкурсанты з розных куткоў краіны і ўсе ў касцюмах свайго раёна, якія адрозніваюцца каляровай разнастайнасцю", - дадала Кацярына Лабука, адзначыўшы, што масавае шэсце ўдзельнікаў стане яркай падзеяй і надасць нацыянальны каларыт фестывалю. Акрамя беларусаў, у народных праектах плануюць узяць удзел калектывы з Украіны і Расіі.

На пляцоўках Віцебска выступяць духавыя аркестры, пройдзе конкурс глінянай цацкі, майстар-класы па яе вырабе. Таксама арганізатары збіраюцца запусціць з "Беларусьфільмам" кінатэатр пад адкрытым небам. Для тэатральнай публікі Нацыянальны акадэмічны драматычны тэатр імя Якуба Коласа пакажа сваю праграму. Беларускі тэатр "Лялька" у восьмы раз прадставіць папулярны "Лялечны квартал". Творчыя калектывы з Беларусі, Расіі і Украіны пакажуць спектаклі для дзяцей і дарослага гледача. Віцебская філармонія рыхтуе джазавы праект, а таксама канцэрты сваіх калектываў. У парку "Мазурына" пройдзе чэмпіянат па аўтагуку і фестываль фарбаў Holi Fest. Таксама арганізатары запрашаюць на Дзень моладзі.

"Славянскі базар у Віцебску" пройдзе з 14 па 19 ліпеня. Урачыстая цырымонія адкрыцця фестывалю адбудзецца 15 ліпеня, закрыцця - 18 ліпеня.

БЕЛТА.