У аграгарадку Зубкі Лёзненскага раёна адбылося адкрыццё другой чаргі станцыі ачысткі ад жалеза
Другі пускавы комплекс уключыў будаўніцтва водаправодных сетак на вуліцах Дабрамысленскай, Будаўнікоў, Станцыйнай, Вугольскага, 1-й Камунальнай і іншых, дзе пражывае каля паловы жыхароў райцэнтра, а таксама ў аграгарадку Зубкі.
– Адкрыццё станцыі абезжалезвання ў гарадскім пасёлку Лёзна, безумоўна, вельмі важная падзея не толькі для раёна, але і для ўсёй нашай вобласці. Бо праект такога маштабу апошні раз рэалізоўваўся на тэрыторыі Віцебшчыны каля 5 гадоў таму. Было затрачана больш за 4 млн рублёў, а таксама праведзены велізарны пласт працы – пракладзена каля 9,5 км сетак і многае іншае. Галоўнае – сёння мы можам з упэўненасцю сказаць, што лёзненцы і жыхары аграгарадка Зубкі атрымалі чыстую, якасную і смачную ваду, якая будзе дастаўляцца бесперабойна, – адзначыў старшыня абласнога Савета дэпутатаў Уладзімір Церанцьеў. – Новыя станцыі абезжалезвання з'явяцца яшчэ ў 13 аграгарадках раёна, а за 2024 –2025 гады ўсе работы ў рамках рэалізацыі падпраграмы «Чыстая вада» Дзяржаўнай праграмы «Камфортнае жыллё і спрыяльнае асяроддзе» будуць завершаны.
Для жыхароў дадзенага населенага пункта, ды і ўсяго райцэнтра, аб'ект вельмі важны і доўгачаканы. На працягу апошніх дзесяці гадоў актыўна ішло будаўніцтва шматкватэрнай і індывідуальнай жылой забудовы ў Лёзне. Сказваліся і анамальна высокія тэмпературы навакольнага паветра, у выніку чаго рэзка ўзрастала нагрузка на аб'екты водазабеспячэння, у тым ліку на абсталяванне станцыі абезжалезвання. Так, у гадзіны пік адзначалася адсутнасць вады на верхніх паверхах шматпавярховых забудоў, або яна падавалась у разводзячую сетку з адхіленнямі ад нарматываў (у пітной вадзе прысутнічалі мутнасць і падвышанае ўтрыманне жалеза, наяўнасць якіх тлумачылася абмежаванай магутнасцю існуючых водагаспадарчых збудаванняў і прылад).
Своечасова пры ўдзеле кіраўніка абласнога дэпутацкага корпуса было прынята рашэнне аб будаўніцтве аб'ектаў водазабеспячэння са станцыяй абезжалезвання ў Лёзне і магчымасцю падключэння да сістэмы водазабеспячэння аграгарадка Зубкі.
У студзені 2023 года ў рамках рэалізацыі інвестыцыйнай праграмы «Чыстая вада па Віцебскай вобласці» быў рэалізаваны першы пускавы комплекс. Ён уключаў дзве артэзіянскія свідравіны, станцыю водападрыхтоўкі прадукцыйнасцю 40 куб. м у гадзіну, два рэзервуары з чыстай вадой, а таксама будаўніцтва і замену ўчасткаў водаправодных сетак на вуліцах Дабрамысленскай і Чкалава ў Лёзне. Кошт будаўніча-мантажных работ склаў больш за 2 млн 80 тыс. руб.
Рэалізацыя інвестпраекта дазволіла не толькі павысіць надзейнасць сістэмы водазабеспячэння, мінімізаваць выпадкі з падачай вады ненадлежнай якасці спажыўцам райцэнтра, але і забяспечыць жыхароў аграгарадка Зубкі з колькасцю насельніцтва каля 500 чалавек якаснай пітной вадой, якая адпавядае спажывецкім уласцівасцям у поўным аб'ёме.
У рамках рэалізацыі інвестыцыйнай праграмы «Чыстая вада» толькі ў Лёзненскім раёне ўведзены і працуюць станцыі абезжалезвання, якія забяспечваюць якаснай пітной вадой жыхароў населеных пунктаў Адаменкі, Пушкі, Кавалі, Новае Сяло, Чарнаручча, Высочаны, Крынкі.