У Віцебску ўшанавалі найлепшых супрацоўнікаў абласнога ўпраўлення Дзяржаўнага камітэта судовых экспертыз
Сярод ганаровых гасцей, якія сабраліся ў абласной філармоніі, – прадстаўнікі мясцовай улады і розных ведамстваў.
22 красавіка 2013 года Прэзідэнтам Рэспублікі Беларусь Аляксандрам Лукашэнкам быў падпісаны Указ аб утварэнні Дзяржаўнага камітэта судовых экспертыз. Штогодзь у гэты дзень супрацоўнікі ведамства адзначаюць сваё прафесійнае свята.
У фае культурнай установы была прадстаўлена экспазіцыя з фондаў абласнога музея Героя Савецкага Саюза Міная Шмырова аб генацыдзе беларускага народа ў гады Вялікай Айчыннай вайны.
Падчас урачыстай часткі лепшыя супрацоўнікі ўпраўлення ДКСЭ па Віцебскай вобласці былі ўзнагароджаны ганаровымі граматамі і падзякамі.
«Аб'ектыўнасць, гонар, Айчына - асноўныя вызначэнні вернасці служэння беларускага судовага эксперта сваёй дзяржаве і яго народу. Адным з прыярытэтных напрамкаў для нас з'яўляецца забеспячэнне патрэбаў праваахоўных органаў у правядзенні экспертыз для максімальнага скарачэння тэрмінаў расследавання крымінальных спраў, якія вядуцца на тэрыторыі Віцебскай вобласці», – падкрэсліў начальнік упраўлення палкоўнік юстыцыі Андрэй Пазднякоў.
Прысутных павіншаваў старшыня Віцебскага абласнога выканаўчага камітэта. «Вы не толькі дапамагаеце знайсці праўду ў самых заблытаных крымінальных гісторыях, абараніць нявінных, але і спрыяеце рэалізацыі навуковага патэнцыялу краіны, выконваючы значную частку профільных даследаванняў», - адзначыў Аляксандр Субоцін.
За 9 гадоў упраўленнем ДКСЭ па Віцебскай вобласці выканана больш за 382 тысячы экспертыз.
Свята працягнулася канцэртнай праграмай, якую падрыхтавалі артысты Віцебскай абласной філармоніі.
Даведка «ВВ». Заключэнні экспертаў – гэта найважнейшыя крыніцы доказаў. Па большасці крымінальных спраў без іх немагчыма ўстанавіць ісціну. Звярнуцца за правядзеннем экспертыз могуць таксама прыватныя асобы і арганізацыі. Сярод насельніцтва найбольш запатрабаваныя экспертыза на ўстанаўленне бацькоўства, экспертыза ідэнтыфікацыйных маркіровачных абазначэнняў транспартных сродкаў і псіхіятрычная экспертыза перад здзяйсненнем здзелкі з нерухомасцю.
Фота Пятра Чымкоўскага