У Віцебску на пасяджэнні калегіі ў абласным УМНС абмеркавалі пытанні пажарнай бяспекі аб'ектаў з масавым і кругласутачным знаходжаннем людзей

Пяць пажараў і двое загінулых – такой з'яўляецца статыстыка надзвычайных здарэнняў, якія за сем месяцаў бягучага года адбыліся ў інтэрнатах вобласці. Рост агнявых НЗ склаў 66%. Хто вінаваты? Як у будучыні пазбегнуць падобных трагедый? Гэтыя і іншыя пытанні, звязаныя з забеспячэннем пажарнай бяспекі аб'ектаў з масавым і кругласутачным знаходжаннем людзей, з'яўляюцца прыярытэтнымі для ратавальнікаў і знаходзяцца на пастаянным кантролі. У прыватнасці, іх аналізу было прысвечана пасяджэнне калегіі ў абласным УМНС, дзе сабраліся прадстаўнікі дзяржаўных органаў кіравання і непасрэдна кіраўнікі суб'ектаў гаспадарання.

У сакавіку з-за неасцярожнага абыходжання з агнём у інтэрнаце ААТ «Віцязь» у Віцебску адбыўся пажар, у выніку якога загінуў чалавек. Аналагічны трагічны вынік мела ўзгаранне ў інтэрнаце КУП «ЖРЭА» Наваполацка, якое ўзнікла па той жа прычыне – чалавечая неасцярожнасць. Пражываючыя ў інтэрнатах часта не выконваюць супрацьпажарны рэжым. Некаторыя могуць дазволіць сабе закурыць у пакоі і забыць загасіць цыгарэту. Яшчэ адна прычына – перагрузка электрасеткі. Нягледзячы на тое, што праводка ў інтэрнатах пакідае жадаць лепшага, грамадзяне ўсё роўна адначасова падключаюць у разеткі адразу некалькі электрапрыбораў. Каб пазбегнуць бяды, неабходна, перш за ўсё, кожны інтэрнат абсталяваць сістэмамі пажарнай аўтаматыкі, якія, як паказвае практыка, дазваляюць своечасова апавясціць аб узніклым узгаранні.

Аднак сёння імі не аснашчаны 27 інтэрнатаў рэгіёна. У 13 сігналізацыі маюцца, але знаходзяцца ў няспраўным стане. Як паведаміў начальнік аддзела нагляду і прафілактыкі абласнога УМНС Яўген Казлоў, па выніках праведзеных у бягучым годзе праверак было выяўлена 959 парушэнняў патрабаванняў пажарнай бяспекі. Так, большая частка недахопаў устранена, але больш за 300 мерапрыемстваў застаюцца невыкананымі. Кіраўнікі панеслі адпаведнае пакаранне. Гэта сведчыць аб адсутнасці ведамаснага кантролю за забеспячэннем пажарнай бяспекі на аб'ектах.

Дарэчы, у снежні мінулага года дзейнасць інтэрната Верхнядзвінскага ЖКГ у Боркавічах прыпынена, бо ўмовы пражывання там былі прызнаны небяспечнымі. Гэта крайняя мера, на якую былі вымушаны пайсці работнікі супрацьпажарнага ведамства.

Сёння ў суб'ектаў гаспадарання, да якіх былі прэтэнзіі ў супрацоўнікаў МНС, выпрацаваны дакладныя планы па забеспячэнні бяспечных умоў пражывання жыльцоў у інтэрнатах. Іх плануецца рэалізаваць да канца бягучага года. Таксама неабходна ўзмацніць прафілактычную працу сярод пражываючых.

Забеспячэнне пажарнай бяспекі аб'ектаў з масавым і кругласутачным знаходжаннем людзей, у тым ліку інтэрнатаў, — адна з мэт Дырэктывы №1 Прэзідэнта Рэспублікі Беларусь. Сёння гэтая задача стаіць перад дзяржаўнымі органамі ўсіх узроўняў, кіраўнікамі арганізацый незалежна ад форм уласнасці.

"Віцебскія весці".