У Віцебску абмеркавалі напаўняльнасць кансалідаванага бюджэту вобласці

– Падатковыя органы актыўна выкарыстоўваюць новыя формы ўзаемадзеяння з плацельшчыкамі, у тым ліку з прымяненнем інфармацыйных тэхналогій. У людзей фарміруецца адказнасць у адносінах да дзяржавы, грамадства. Гэта вельмі важна, – адзначыў Дзмітрый Дзямідаў.

Падаткі, як падкрэсліў старшыня аблсавета Дзмітрый Дзямідаў, сведчаць пра здароўе эканомікі і ўзровень цывілізацыі грамадства. У апошнія гады сума падатковых паступленняў апярэджвае рост валавога рэгіянальнага прадукту. Яны выраслі па ўсіх крыніцах. Подоходны падатак – на 21%, на прыбытак – на 42%, на дабаўленую вартасць – на 21%, маёмасны – на 58%. Гэта сведчыць пра паляпшэнне сістэмы адміністравання, удасканаленне працы фіскальных органаў, якія заахвочваюць людзей выконваць свае абавязацельствы перад мясцовымі бюджэтамі.

Начальнік інспекцыі Міністэрства па падатках і зборах Рэспублікі Беларусь па Віцебскай вобласці Валерый Лабацэвіч пацвердзіў сказанае лічбамі: за 8 месяцаў у абласны бюджэт паступіла 1 млрд 960 млн рублёў. Гэта на 400 млн больш, чым у 2023-м.

– Такія вынікі дасягнуты дзякуючы рэфармаванню прадпрымальніцкай дзейнасці, павышэнню фінансавай пісьменнасці і адказнасці плацельшчыкаў, што павялічыла добраахвотныя паступленні плацяжоў у бюджэт, – паведаміў Валерый Лабацэвіч.

Кіраўнік ведамства завастрыў увагу на слабых месцах. Гэта высокі ўзровень запазычанасці суб'ектаў гаспадарання перад бюджэтам, наяўнасць стратных арганізацый, прадпрыемстваў, якія выплачваюць нізкую зарплату. Недастаткова ўвагі надаецца развіццю малога і сярэдняга бізнесу, уцягванню працаздольнага насельніцтва ў эканамічную дзейнасць. Вырашэнне гэтых праблем дазволіць павялічыць плацяжы ў бюджэт і – як следства – рэалізаваць сацыяльныя праграмы і забяспечыць рост дабрабыту людзей.

Намеснік начальніка галоўнага фінансавага ўпраўлення аблвыканкама Інна Юшчанка падкрэсліла, што даходы абласнога бюджэту напрамую залежаць ад таго, наколькі добра працуе эканоміка.

– Важна павышаць эфектыўнасць фінансава-гаспадарчай дзейнасці прадпрыемстваў, ствараць новыя высокапрадукцыйныя працоўныя месцы, выконваць заданні па росце аплаты працы, стымуляваць інвестыцыйную актыўнасць плацельшчыкаў, – сказала Інна Юшчанка.

Ёсць доля плацяжоў у мясцовыя бюджэты, якія не кантралююцца падатковымі органамі. Гэтая доля – прыкладна 10%, і яна расце. Да яе адносяцца рэалізацыя маёмасці, уключаючы зямельныя ўчасткі на аўкцыёнах, даходы ад аказання платных паслуг, штрафы і інш. Для забеспячэння паўнаты паступленняў у мясцовыя бюджэты непадатковых даходаў створаны інстытут адміністравання. Адміністратарамі з'яўляюцца камітэты, упраўленні, аддзелы выканкамаў, іншыя арганізацыі.

Дэпутаты адзначылі як станоўчую, так і недастатнюю дзейнасць некаторых райвыканкамаў і намяцілі галоўныя напрамкі працы, якія дазволяць зрабіць наш бюджэт больш важкім, а значыць, і гарантаваць выкананне ў поўнай меры сацыяльных праграм.

"Віцебскія весці"