У Віцебску пасля рэканструкцыі адкрылі лыжаролерную трасу

Сёння да Дня народнага адзінства ў Віцебскім дзяржаўным вучылішчы алімпійскага рэзерву адбылося ўрачыстае адкрыццё пасля рэканструкцыі лыжаролернай трасы. У мерапрыемстве ўдзельнічалі прадстаўнікі Міністэрства спорту і турызму Беларусі, кіраўнікі вобласці, ветэраны спорту і юныя спартсмены.

– Дазвольце вас павіншаваць з адным з самых маладых, але вельмі важных дзяржаўных святаў – Днём народнага адзінства, – сказаў, звяртаючыся да прысутных, старшыня аблвыканкама Аляксандр Субоцін. – Гэта траса – пацвярджэнне таго, што, калі мы разам, можам зрабіць усё, што заплануем і захочам. Яна – выдатны падарунак не толькі вучылішчу, але і гораду, вобласці і, вядома ж, нашай краіне. Тое, што за кароткі час зроблена на гэтым месцы, – гэта проста неверагодна. Тым больш з'явілася такое выдатнае стралковая пляцоўка. І яна ў разы палегчыць і трэніровачны працэс, і дазволіць прыцягнуць сюды спаборніцтвы рознага ўзроўню. Пацвярджэннем таму з'яўляецца, што на наступны год дадзеная траса ўжо распісана і па вучэбна-трэніровачных зборах, і па спаборніцтвах рознага ўзроўню. Я думаю, што дзякуючы добраўпарадкаванню і з'явіўшайся інфраструктуры на трасе будзе велізарная колькасць гараджан, якія тут стануць трэніравацца, адпачываць ці проста займацца фізкультурай.

Усіх са святам! Дзякуй будаўнікам і нашай дзяржаве за выдатны падарунак усім нам. Чакаем ад вучылішча новых перамог і чэмпіёнаў.

Як паведаміў «ВВ» дырэктар ВДУАР Уладзімір Машнюк, рэканструкцыя трасы доўжылася з лістапада 2023 года. Яна дастаткова складаная і падыходзіць для правядзення вучэбна-трэніровачнага працэсу і рэспубліканскіх спаборніцтваў. На трасе абсталявана біятлоннае стрэльбішча паўзакрытага тыпу, якое дазволіць праводзіць трэніровачны працэс па біятлоне. Таксама зроблена агароджа, асвятленне, праведзены рамонт асфальтабетоннага пакрыцця. Абсталявана месца забору вады для вытворчасці штучнага снегу, што дазволіць хутка рабіць яго і праводзіць спаборніцтвы пры адсутнасці снежнага покрыва.

– Асаблівасці рэльефу трасы дазволяць эфектыўна развіваць хуткасна-сілавыя якасці юных спартсменаў, – падкрэсліў дырэктар ВДУАР.

У ходзе урачыстай цырымоніі адкрыцця адбылося выступленне творчых калектываў Віцебска, а затым была змешаная эстафета, у якой удзельнічалі юныя спартсмены.

– На гэтай трасе шыкоўнае пакрыццё, лыжы добра па ім коцяцца, – падзялілася адчуваннямі ўдзельніца каманды-пераможцы, вучаніца ВДУАР Кіра Старавойтава. – На такой трасе прыемна займацца спортам. Спадзяюся, што трэніроўкі ў такіх выдатных умовах дазволяць мне дасягнуць высокіх спартыўных вынікаў. А ў эстафеце мы выйгралі, перш за ўсё, дзякуючы таму, што партнёры па камандзе выдатна выступілі.

Фота Аляксея Уронскага