У Віцебску запусцілі незвычайны анлайн-віктарыну па электаральнай кампаніі

У Віцебску запусцілі пазнавальны квiз «Да выбараў гатовыя». Цікавую ідэю ўвасобілі ў Першамайскім раёне абласнога цэнтра. Квiз стаў часткай маштабнага інфармацыйна-асветніцкага праекта самага вялікага раёна Віцебска па электаральнай актыўнасці моладзі «Моладзь вырашае».

Фота з архіва «СБ»

Праект разлічаны на моладзь ад 14 да 31 года і складаецца з разнапланавых мерапрыемстваў, задача якіх – больш актыўна залучаць маладых беларусаў у выбарчы працэс, зацікавіць пытаннямі дзяржаўнага кіравання. Як расказалі ў адміністрацыі Першамайскага раёна Віцебска, праграма «Моладзь вырашае» самая шырокая. Гэта тэматычныя сустрэчы з прадстаўнікамі палітычных партый, марафон «Я сам выбіраю сваю будучыню», флэшмоб «Я – грамадзянін» сярод удзельнікаў клубаў маладых выбаршчыкаў, дзелавыя гульні, дэбаты, стварэнне ролікаў, відэакліпаў, электронных прэзентацый, анкетаванне і многае іншае.

Моладзь – асноўны электаральны рэзерв грамадства, разважае адзін з удзельнікаў праекта, педагог-арганізатар віцебскай гімназіі № 5 імя І.І. Люднікава Валянцін Радкевіч:

– Па статыстыцы, кожны чацвёрты патэнцыйны выбаршчык – ва ўзросце да 30 гадоў. І гэта варта ўлічваць, працуючы з моладдзю, тлумачачы ёй, што прыйсці на выбары – гэта не проста абавязак кожнага з нас як грамадзяніна, а ў першую чаргу магчымасць унесці свой уклад у сваю будучыню і будучыню сваёй краіны. Пры гэтым гаварыць пра палітыку з моладдзю трэба на зразумелай ёй мове. Напрыклад, учора наша каманда «Моладзь вырашае» падтрымала інтэрнэт-чэлендж «Адкрый паштовую скрыню». Пасыл відэароліка, да якога можа далучыцца любы ахвотны, просты: ідзі на выбары, каб тваё заўтра было ў тваіх жа руках.

Пра старт сёння, 15 лютага, віктарыны «Да выбараў гатовыя» расказаў адзін з галоўных яе распрацоўшчыкаў Ілья Кузняцоў. Настаўнік гісторыі сярэдняй школы № 12 Віцебска і па сумяшчальніцтве, як і Валянцін Радкевіч, член Савета працоўнай моладзі пры адміністрацыі Першамайскага раёна Віцебска падзяліўся:

– Віктарыну з дзесяці пытанняў аб электаральнай кампаніі можна прайсці ў сацсетках, у прыватнасці ў Telegram-канале «PRO Першамайскі». Пры складанні квіза за арыенцір было ўзята жаданне сапраўды зацікавіць удзельнікаў. Пытанні так адразу не гугляцца ў інтэрнэце. Каб адказаць правільна, трэба быць пад­каваным у тэме. Зрэшты, у якасці бонуса мы прапануем самае простае пытанне, на якое дакладна адкажуць усе: яно пра адзіны дзень галасавання – 25 лютага.

"СБ"