У Віцебскай вобласці засеяна 49,2% запланаваных плошчаў
У мінулую пятніцу Прэзідэнт Беларусі Аляксандр Лукашэнка заслухаў падрабязную дакладную запіску міністра сельскай гаспадаркі і харчавання Івана Крупко аб сітуацыі, якая складваецца ў сувязі з неспрыяльнымі ўмовамі надвор'я. Сярод асноўных праблемных пытанняў – зацягнуты сеў азімых культур. Па выніках даклада Аляксандр Лукашэнка даў шэраг даручэнняў. У прыватнасці, ураду, кіраўніку Мінсельгасхарча сумесна з губернатарамі – актывізаваць сельскагаспадарчыя работы і, калі магчыма, весці сеў азімых у тым ліку да позняга вечара, каб максімальна выкарыстоўваць пагодлівыя дні. Задача нумар адзін – пасеяць азімыя на працягу тыдня.
Згодна з рэспубліканскай зводкай, на ўчарашні дзень у Віцебскай вобласці было пасеяна 49,2% запланаваных плошчаў. Для параўнання, у Брэсцкай вобласці – 55,2%, Гродзенскай – 53,8%, Мінскай – 51%, Магілёўскай – 48,6%, Гомельскай – 41,5%.
Непагодлівае надвор'е паўплывала на сітуацыю і ў Віцебскім занальным інстытуце сельскай гаспадаркі НАН Беларусі – з-за раскіслага глебы сеялка прастойвала. Як паведаміла загадчыца аддзела ВЗІСГ Любоў Картавенкава, да дажджоў пад азімыя культуры – трыцікале, жыта, ячмень – было занята больш за 200 га, што складае палову плошчаў. У бліжэйшы тыдзень плануецца пасеяць амаль 200 га пшаніцы. Механізатар Сяргей Ігнацьеў (на фота) спраўляецца з дзённай нормай у 40 га.
На думку вучонай, з улікам таго, што на працягу апошніх гадоў восень дастаткова працяглая, азімую пшаніцу спакойна можна сеяць да 5-7 кастрычніка. Галоўнае, каб з моманту ўсходаў да пастаянных замаразкаў прайшло 40 дзён. У такім выпадку культура добра перанясе зіму.
На мінулым жніве азімыя ў ВЗІСГ далі нядрэнны ўраджай: пшаніца – 58 ц/га, трыцікале – 52 ц/га, жыта – за 50 ц/га.