Уладзімір Пянін: «Падтрымка неабароненых слаёў насельніцтва – прыярытэтны кірунак у працы сферы сацабароны»
– Усе мы знаходзімся напярэдадні важнай у жыцці нашай краіны падзеі – рэферэндуму па прыняцці новай Канстытуцыі, – падкрэсліў Уладзімір Пятровіч. – Як і ў мінулай, так і ў новай Канстытуцыі дзяржава застаецца сацыяльна арыентаванай. Што тычыцца сацыяльнай абароны, то абласны камітэт надае вялікую ўвагу людзям, якія апынуліся ў складанай жыццёвай сітуацыі, – беспрацоўным, самотна пражываючым, інвалідам, адзінокім пенсіянерам, каб яны сябе камфортна адчувалі, былі запатрабаванымі членамі грамадства. Надаём належную ўвагу і ўмацаванню матэрыяльна-тэхнічнай базы. У прыватнасці, рамонту дамоў-інтэрнатаў, якіх у нашай вобласці налічваецца 15, ТЦСАН. У 2021-м пачалі рамонт Бабініцкага дома-інтэрната ў Аршанскім раёне, які плануем завяршыць сёлета. Ужо падрыхтавана праектна-каштарысная дакументацыя на рэканструкцыю Аляксандраўскага дома-інтэрната ў Шаркаўшчынскім раёне, у 2023 годзе ён будзе адрамантаваны, і шэраг іншых праектаў. У бюджэце вобласці для гэтых мэт закладзены сродкі. Упэўнены, што справімся з усімі праблемамі, якія ў нас ёсць.
Перш чым абмеркаваць вынікі працы за 2021 год і вызначыць задачы ў сферы працы, занятасці і сацыяльнай абароны, удзельнікі калегіі змаглі азнаёміцца з дзейнасцю тэрытарыяльных цэнтраў, якія разгарнулі маштабную выставу па сваіх асноўных напрамках.
Прэзентацыя кожнага ТЦСАН заслугоўвае асобнай публікацыі – настолькі шмат цікавых праектаў і новацый яны рэалізуюць і выкарыстоўваюць у сваёй працы. Вось, скажам, у аддзяленні дзённага знаходжання ТЦСАН Першамайскага раёна Віцебска пажылыя людзі раскрываюць свае магчымасці ў вывучэнні англійскай мовы, асваенні камп'ютара, маляванні пяском, у танцах. Гледзячы на дам, якія ў прыгожых танцавальных касцюмах элегантна самавыяўляліся пад музыку, няволі не падумаеш: «Маладым яшчэ фору дадуць!»
У Наваполацкім ТЦСАН з лёгкай рукі былога мэра, а цяпер старшыні Савета Рэспублікі Наталлі Качанавай, адкрыты і паспяхова функцыянуе цэнтр для рэабілітацыі людзей з цяжкімі і множнымі парушэннямі. Тут унедрына новая методыка навучання інвалідаў па сістэме «ясная мова», якая дазваляе асвоіць нават ігру на фартэпіяна.
Зрэшты, калі людзі, прыкаваныя да пасцелі, якія маюць патрэбу ў дапамозе, пройдуць такую рэабілітацыю з дапамогай шматлікіх трэнажораў і прыстасаванняў, распрацаваных супрацоўнікамі Луначарскага псіханеўралагічнага дома-інтэрната, то ўсё магчыма.
Пры многіх цэнтрах існуюць працоўныя і творчыя майстэрні, дзе наведвальнікі аддзяленняў дзённага знаходжання займаюцца грамадска карыснай працай, ствараюць брэндавую прадукцыю – лялек, кружкі з беларускай сімволікай ад «Росаначкі» або ільноныя вырабы ТЦСАН Аршанскага раёна. Дарэчы, пасля праходжання рэабілітацыі ў гэтым аддзяленні дзённага знаходжання 18 чалавек працаўладкаваны.
Асаблівых слоў падзякі заслугоўвае дзейнасць ТЦСАН Лепельскага раёна, дзе працуюць працоўныя майстэрні для наведвальнікаў аддзялення дзённага знаходжання.
Ніводзін праект, ніводная праграма не магчымыя без кваліфікаваных кадраў. Гэта выразна разумее камітэт па працы, занятасці і сацыяльнай абароне аблвыканкама і будуе сваю працу ў цеснай інтэграцыі з супрацоўнікамі ВДУ імя П. Машэрава, якія дапамагаюць праз засваенне спецыяльнай праграмы падрыхтаваць сацыяльных работнікаў, санітараў. Бо ў іх дзейнасці важны індывідуальны падыход.
Наш рэгіён – адзін са старэючых, і гэта накладвае пэўную нагрузку на сацыяльную сферу. У дакладзе старшыня камітэта Аляксандр Хрыстафораў спыніўся на выкананні асноўных паказчыкаў у рабоце, падкрэсліўшы, што на рынку працы захоўваецца тэндэнцыя зніжэння колькасці зваротаў у службу занятасці. На зноў створаныя працоўныя месцы працаўладкавана 4,5 тыс. чалавек, 1,5 тысячы – асабліва тых, хто мае патрэбу ў сацыяльнай абароне. У вобласці забяспечана станоўчая дынаміка росту заработнай платы. А шэраг кіраўніцкіх рашэнняў дазволіў забяспечыць комплексную і сістэмную працу ў галіне аховы працы. На тэхнічнае пераўзбраенне і мадэрнізацыю вытворчасцей арганізацыямі вобласці было зрасходавана звыш 32 млн руб. Для больш чым двух тысяч работнікаў палепшаны ўмовы працы. Запланаваныя на 2021 год мерапрыемствы выкананы з апярэджаннем і ў поўным аб'ёме.
Віцебская вобласць займае годнае месца ў сістэме сацыяльнага абслугоўвання, падкрэсліла намеснік міністра працы і сацыяльнай абароны Беларусі Марына Арцёменка, якая прыняла ўдзел у рабоце калегіі. Вопыт і новацыі сферы сацабароны рэгіёна, асабліва ў рабоце з інвалідамі, будуць распаўсюджвацца на ўсю рэспубліку. Асаблівай пахвалы заслугоўвае той факт, што ў работу тэрытарыяльных цэнтраў уцягваюцца людзі з інваліднасцю. У мінулым годзе ў вобласці ў поўнай дзеяздольнасці адноўлены 10 чалавек. Трэба адзначыць, што на грамадзянах з інваліднасцю цяпер робіцца асаблівы акцэнт. У праекце Асноўнага закона яны выдзелены як асобная катэгорыя, якая заслугоўвае асаблівай падтрымкі дзяржавы. Стварэнне працоўных і творчых майстэрняў, адкрыццё вытворчых прадпрыемстваў з прадастаўленнем працоўных месцаў для інвалідаў – усе гэтыя напрацоўкі годныя пераймання і распаўсюджвання на іншыя вобласці рэспублікі, падкрэсліла Марына Арцёменка.
Віцебская вобласць займае другое месца па ахопе непрацаздольных грамадзян (больш за 27 тыс. чалавек) сацыяльным абслугоўваннем і першае – па аказанні паслуг замяшчальных сем'яў. Каля 40% паслуг дзённага нагляду ў агульным аб'ёме па краіне аказваецца ў Віцебскай вобласці. Амаль 50% усёй гуртковай работы на даму для людзей з інваліднасцю таксама праводзяць работнікі сацыяльнай сферы рэгіёна.
У той жа час абласному камітэту, як падкрэсліла намеснік міністра, варта звярнуць увагу на рост сярэдняй заработнай платы ў арганізацыях вытворчай сферы. У Віцебскай вобласці не выканалі гэты паказчык у 12 арганізацыях (такіх па краіне 86), трэба актыўней узаемадзейнічаць з інвалідамі, якія маюць паказанні да працоўнай дзейнасці, у вобласці працуюць толькі 47% такіх грамадзян.