З аншлагам сустрэў Віцебск Міжнародны фестываль сучаснай харэаграфіі, які ўжо 36 гадоў збірае ў горадзе на Дзвіне аматараў танца модерн

Як адзначыў на адкрыцці форуму старшыня аблвыканкама Аляксандр Субоцін, IFMC стаў неад'емнай часткай нашай культурнай спадчыны. Фестываль дорыць унікальную магчымасць пазнаёміцца з найноўшымі тэндэнцыямі ў свеце харэаграфіі, абмяняцца творчым вопытам і ўсталяваць прафесійныя кантакты. Ён служыць магутным стымулам для развіцця культурнага дыялогу паміж краінамі і народамі, даказваючы, што мастацтва танца не ведае межаў і здольна гаварыць на ўніверсальнай мове пачуццяў і эмоцый.

– Асаблівую гордасць выклікае станаўленне моцнай нацыянальнай харэаграфічнай школы. Нашы танцоры і балетмайстры сёння перамагаюць на прэстыжных міжнародных конкурсах, а іх пастаноўкі з поспехам ідуць на лепшых сцэнах Беларусі, Расіі і многіх краін свету. Гэта наглядны вынік мэтанакіраванай працы па падрыхтоўцы творчых кадраў і развіцці культурнага патэнцыялу нашай краіны, – сказаў кіраўнік вобласці.
IFMC заслужыў прызнанне як значная падзея ў міжнародным культурным жыцці, якая дэманструе актуальныя тэндэнцыі і інавацыйныя пошукі ў галіне сучаснай харэаграфіі. Асаблівую каштоўнасць фестывалю надае яго арыентаванасць на будучыню – на падтрымку маладых талентаў, на эксперыментальныя формы і смелыя творчыя рашэнні, падкрэсліў у сваім прывітанні міністр культуры Беларусі Руслан Чарнецкі.

У першы фестывальны вечар адбылося знаёмства з галоўнымі героямі танцавальнага форуму – удзельнікамі нацыянальнага конкурсу, які адбудзецца ў апошні раз. Адгэтуль ён будзе праходзіць толькі ў міжнародным фармаце. За ўзнагароды IFMC будуць змагацца 20 калектываў з розных куткоў Беларусі, Віцебск прадставяць праект Ганны Канстанцінавай, Заслужаны аматарскі калектыў Рэспублікі Беларусь народны тэатр-студыя сучаснай харэаграфіі і студыя сучаснага танца «ТЭГ» Віцебскага дзяржаўнага каледжа культуры і мастацтваў.

У другім аддзяленні гледачы ўбачылі праграму-дывертысмент «Балеро+» ад трупы «Балет Масква» тэатра «Новая опера».

Тры танцавальныя мініяцюры, пастаўленыя трыма харэографамі: «Tango, Song and Dance», «Ундина» і Presto con moto. У фінале выступлення была паказана харэаграфічная трактоўка знакамітага твора Марыса Равеля «Балеро».

"Віцебскія весці"