Больш за 30 гоншчыкаў з Беларусі і Расіі сабраў штогадовы фестываль Gymkhana drive fest – 2025
У аўтафестываль дакладна ўкладваюць душу. Яго арганізатар - шасціразовы чэмпіён Беларусі па спартыўным манеўраванні, прафесійны аўтаспартсмен Аляксей Шэндзюкоў сёлета пастараўся прыцягнуць больш пілотаў з Расіі. Вынік не прымусіў сябе доўга чакаць - аншлаг на трыбунах гледачоў быў ад пачатку і да канца. Публіку чакалі драйвовыя спаборніцтвы, суперзаезды зоркі аўтаспорту Аляксея Шэндзюкова, розыгрыш прызоў і выстава рэдкіх аўтамабіляў.
Самы юны ўдзельнік гонак – 15-гадовы Дзяніс Кукушкін. У спаборніцтвах па джымхане хлопец удзельнічае ўжо чацвёрты раз. Гонкі, дрыфт і запал да аўтамабіляў у хлопца ў крыві ў самым прамым сэнсе.
На пытанне, хто ў такім юным узросце навучыў кіраваць аўтамабілем, Дзяніс нечакана стаў пералічваць… усіх членаў сям'і. Яго мама, Святлана, – гоншчыца. У розныя гады яна была пераможцай ADT.BY. І хоць у 2003 годзе Святлана завяршыла кар'еру, аўтаспорт з ёй застаўся назаўжды. На гонках яна пазнаёмілася са сваім мужам (бацькам Дзяніса), і праз столькі гадоў яны выгадавалі двух сыноў, якія гэтак жа, як і бацькі, цяпер не ўяўляюць свайго жыцця без віску шын і дрыфту.
Да 14 гадоў хлопец вывучаў машыны, назіраючы за бацькамі, а ўласны досвед атрымліваў пры дапамозе камп'ютарнай праграмы-сімулятара кіравання.
Год таму на дзень нараджэння сям'я вырашыла зрабіць сыну падарунак і ўпершыню на закрытай пляцоўцы на старым Ford Sierra ён «пракруціў свае першыя пяцёркі і васьмёркі», а крыху пазней дэбютаваў на спаборніцтвах.
– Было страшна і хвалююча, бо баяўся пашкодзіць машыну. Сёння я адчуваю сябе больш упэўнена. На пляцоўцы атрымліваеш ад іншых удзельнікаў такі зарад драйву, што застацца абыякавым немагчыма.
– У жыцці дакладна няма нічога недасяжнага, – лічыць Дзяніс.
У будучыні ён плануе стаць пілотам або механікам у гоначнай камандзе Porsche. Дарэчы, сваім кумірам і падтрымкай юны аўтаспартсмен лічыць роднага брата, таму ў тым, што ў хлопца ажыццявіцца ўсё задуманае – няма сумневаў, калі побач надзейнае братэрскае плячо.
З асаблівай пашанай на пляцоўцы ставяцца да гоншчыц. Мінчанка Вольга на Gymkhana drive fest у Віцебску ўдзельнічае не ў першы раз. Хоць часцей дзяўчына спаборнічае ў сталіцы, стартавыя ў яе жыцці заезды праходзілі менавіта ў паўночным рэгіёне.
– Люблю гэтыя спаборніцтвы за драйв, экшэн і бяспеку. Гэта месца для мяне знакавае, пасля першага майго ўдзелу ў Gymkhana drive fest у Віцебску некалькі гадоў таму я купіла сваю гоначную машыну.
Гледацкія трыбуны ў гэты дзень разрываюцца ад крыкаў падтрымкі і апладысментаў. Аляксандр любіць ездзіць на дрыфт у Мінск і ніколі не прапускае Gymkhana drive fest у родным Віцебску. Любоў да машын хлопцу прывіў бацька. У дзяцінстве іх сумесным хобі было хадзіць на спаборніцтвы па спартыўным манеўраванні. Сёлета на аўтафестываль хлопец прыйшоў са сваёй дзяўчынай Юліянай. Цяпер гэта іх супольная традыцыя.
– Мне ўсё жыццё цікавіць тэхнічная прылада аўтамабіля. Я «заліпаю» над тым, як едуць пілоты, як абсталяваны гоначныя машыны. У мяне ёсць правы і калі калі-небудзь з'явіцца магчымасць, я б паспрабаваў сябе ў аўтаспорце, – падзяліўся Аляксандр.