Конкурс накіраваны на падтрымку інавацыйных і сацыяльна значных ідэй у сферах гарадскога асяроддзя, маладзёжнай палітыкі, валанцёрства, архітэктуры, творчасці, спорту і іншых. Яго арганізатары – абласная Асацыяцыя мясцовых Саветаў дэпутатаў і Маладзёжны савет пры Віцебскім абласным Савеце дэпутатаў.
Усяго было прадстаўлена больш за 30 маладзёжных праектаў з гарадоў і раёнаў вобласці. Перад удзельнікамі стаяла няпростая задача – усяго за тры хвіліны прэзентаваць сваё дзіця і пераканаць кампетэнтнае журы на чале са старшынёй Віцебскага абласнога Савета дэпутатаў Дзмітрыем Дземідавым у тым, што іх ініцыятыва – лепшая.
– Гэта першы праект, які закліканы даць магчымасць найбольш актыўным прадстаўнікам нашай моладзі праявіць сябе, выказаць свае ідэі ў галіне развіцця малой радзімы, – адзначыў Дзмітрый Дземідаў. – Мы не абмяжоўвалі тэматыку ініцыятыў, каб хлопцы маглі цалкам раскрыць свой патэнцыял, таленты і данесці сваё бачанне таго, што адбываецца ў рэгіёне, унесці прапановы, накіраваныя на паляпшэнне працы з моладдзю, адчуць сябе суб'ектамі працэсаў, якія адбываюцца ў нас у вобласці.
Прадстаўленыя на конкурс работы датычыліся розных аспектаў жыцця, але самае галоўнае – усе яны былі выкананы з любоўю і накіраваны на паляпшэнне жыцця людзей, рэалізацыю ідэй па добраўпарадкаванні і захаванні гістарычнай памяці, стварэнне ўмоў для заняткаў спортам і адпачынкам. «Праектавала будучыню» моладзь з Віцебска, Оршы, Талачына, Сенна, Шуміліна, Дубровны, Глыбокага, Мёраў, Докшыц, Бешанковіч, Росанаў, зразумела, з прымяненнем сучасных тэхналогій і ведаў.
Так што журы мела цяжкасці, але ў выніку названы тры пераможцы, якія атрымаюць фінансаванне да 6000 рублёў ад абласной Асацыяцыі мясцовых Саветаў дэпутатаў. Гэта праект «Круці педалі здароўю і чыстай планеце» (Талачын), «Свабода творчасці без узросту і межаў» (Докшыцы»), «Стварэнне пакоя рэлаксацыі» (г.п. Багушэўск Сенненскага раёна).
– Вы нас зарадзілі сваёй энергіяй, – падводзячы вынікі конкурсу адзначыў Дзмітрый Дзямідаў. – Пераможцы вызначаны, але многія ідэі, якія тут былі агучаны, узяты на заметку для наступнай рэалізацыі. Упэўнены, што ў далейшым будуць увасоблены ў жыццё не толькі гэтыя тры праекты.
– Калі шчыра, мы наогул не чакалі, што выйдзем пераможцамі, – сказала намеснік начальніка аддзела архітэктуры і будаўніцтва Талачынскага райвыканкама Ганна Кулік. – Наш праект накіраваны на развіццё экасцежкі, стварэнне велапракату. І гэта тое, чаго сапраўды не хапае нашаму гораду.
"Віцебскія весці"
