Наталля Качанава: Скаргаў ад насельніцтва ў Віцебскай вобласці становіцца менш
На выязным пашыраным пасяджэнні Прэзідыума Савета Рэспублікі Нацыянальнага сходу Рэспублікі Беларусь ва Ушачах разглядаецца работа са зваротамі грамадзян, якія паступілі ад жыхароў Віцебшчыны, у прыватнасці, у ходзе праведзенага адзінага дня прыёму парламентарыямі.
Як адзначыла Наталля Качанава, статыстыка са зваротамі грамадзян у Віцебскай вобласці дастаткова пазітыўная. Скаргаў стала значна менш.
– Вы ведаеце, якая ўвага надаецца рабоце са зваротамі грамадзян. Прэзідэнт на Усебеларускім народным сходзе, звяртаючыся да парламента, сказаў: мы павінны перш за ўсё ўважліва працаваць з людзьмі. Гэта быў асноўны яго пасыл у адносінах да дэпутацкага корпуса краіны. Гэта датычыцца не толькі парламента, але і ўсіх дэпутатаў. Уважлівае стаўленне, веданне праблем, чым жывуць людзі, якія пытанні неабходна вырашаць на тым ці іншым этапе нашага развіцця – гэта для нас асноватворнае.
Спікер верхняй палаты Парламента звярнула ўвагу, што зацверджаны план работы над законапраектамі на 2026 год, у тым ліку над праектам «Аб змяненні Закона Рэспублікі Беларусь «Аб зваротах грамадзян і юрыдычных асоб».
– Калі казаць шчыра, у нашай краіне гэтая работа выбудавана дастаткова выразна. Мы разумеем задачу, перыядычнасць правядзення прыёмаў грамадзян, ведаем, як сёння трэба працаваць са зваротамі. Але часам не хапае проста ўважлівага стаўлення да людзей. На апошнім прыёме грамадзян, які прайшоў 4 лютага, я ў гэтым пераканалася. Калі пачынаюць людзі задаваць пытанні, я разумею, што мы да іх не дайшлі. Не дайшлі дэпутаты, прадстаўнікі ўлады. Мы не асвяцілі тую ці іншую інфармацыю ў мясцовай газеце ці на тэлебачанні, каб было зразумела, – падкрэсліла Наталля Качанава.
Начальнік галоўнага ўпраўлення па ахове здароўя аблвыканкама Міхаіл Вішневецкі адзначыў, што колькасць зваротаў, якія тычацца працы галіны ў Віцебскай вобласці, невялікая. Гэта вынік мэтанакіраванай работы.
– На працягу года кіраўнікамі галоўнага ўпраўлення праведзена 56 асабістых прыёмаў, у буднія дні працуе гарачая тэлефонная лінія. На першым месцы ў спісе найбольш вострых зваротаў стаяць тыя, якія так ці інакш звязаны з кадрамі. І гэта заканамерна, бо якасць дапамогі напрамую залежыць ад кадравага патэнцыялу. За апошнія 5 гадоў укамплектаванасць урачамі вырасла на 3%, па сярэдніх медыцынскіх работніках на 2%. Забяспечанасць медыцынскай дапамогай на 10 тысяч насельніцтва таксама вырасла з 2020 года на 2%. Аднак Віцебшчына адстае ад іншых рэгіёнаў рэспублікі. Таму мы звяртаем увагу на замацавальнасць медыцынскіх кадраў на першых працоўных месцах і зніжэнне плыннасці. Штогод праходзіць набор па мэтавай падрыхтоўцы спецыялістаў. Колькасць мэтавых месцаў значна павялічана. Адкрыта вячэрняя форма падрыхтоўкі медыцынскіх сясцёр, з 2022 года ажыццяўляецца набор навучэнцаў на базе 9 класаў, – растлумачыў Міхаіл Вішневецкі.
Кожны зварот грамадзян – гэта не проста пісьмо ці электронная заява. Гэта прамы зварот чалавека да дзяржавы з надзеяй быць пачутым, – адзначыў старшыня Віцебскага гарвыканкама Аляксей Героеў.
– Таму сёння мы ставім перад сабой задачу не проста рэагаваць на зварот, а выбудаваць сістэму эфектыўнай працы вертыкалі ўлады, дзе лакмусавай паперкай будзе аператыўнасць рэагавання на запыты людзей. Тэматыка зваротаў, якія паступілі ў гарвыканкам, ахоплівае шырокі спектр праблем. Пераважная большасць датычыцца сферы жыллёва-камунальнай гаспадаркі. Такіх жыхары горада на працягу 2025 года накіравалі 1887 зваротаў, што складае практычна 60% агульнай колькасці, – растлумачыў Аляксей Героеў.
Аналіз дазволіў выявіць найбольш уразлівыя месцы. Так, значная частка зваротаў у сферу ЖКГ паступае па пытаннях рамонту, эксплуатацыі і ўтрымання жыллёвага фонду. Часта яны выкліканы аб'ектыўнымі прычынамі. Сапраўды, каля 40% інжынерных сетак у падвалах памяшканняў жыллёвага фонду горада Віцебска маюць павышаны знос, у сувязі з чым адбываюцца частыя аварыйныя сітуацыі, затапленне падвалаў.
– З улікам гэтага ў горадзе рэалізуецца праграма «Сутарэнне». У межах яе на працягу мінулага года былі выкананы работы па бягучым рамонце і замене інжынерных і малых сетак у 76 шматкватэрных жылых дамах, – працягнуў старшыня гарвыканкама.