Ад караваяў-веліканаў да палётаў на дэльтаплане. У Чашніках маштабна адзначаць абласныя «Дажынкі-2025»
Стала вядомая падрабязная праграма абласнога фестывалю-кірмаша працаўнікоў вёскі "Дажынкі-2025"
Ужо з 10:00 гасцей запрашаюць акунуцца ў атмасферу багацця. Адкрыецца гастранамічны фестываль «Ад Ліёзна да Браслава» і кірмаш «Беларуская кухня», дзе кожнае тэматычнае падвор’е раёнаў Віцебшчыны прапануе свае унікальныя рэгіянальныя «прысмакі» і дэлікатэсы. Паралельна разгорнецца выстава-продаж прадукцыі вядучых прадпрыемстваў паўночнага рэгіёну. У шматлікіх кропках грамадскага харчавання наведвальнікі змогуць атрымаць асалоду не толькі ад традыцыйных страў, але і ад вытанчаных дэлікатэсаў, якімі славіцца кожны раён. З гэтага ж часу пачнуць працу тэматычныя пляцоўкі розных ведамстваў, а «горад рамеснікаў» прадставіць вырабы майстроў з усёй Віцебшчыны. Аматараў тэхнікі парадуе выстава сельгасмашын «Стальная сіла аграрыяў», дзе можна будзе не толькі разгледзець сучасную айчынную тэхніку, прызначаную для палявых работ і збору ўраджаю, але і зрабіць яскравыя фотаздымкі. Прыхільнікаў хлебапякарнага мастацтва чакае абласная выстава-конкурс караваяў ад прадпрыемстваў аб’яднання «Віцебскхлебпрам». Тут будуць прадстаўлены сапраўдныя творы мастацтва — ад млыноў з сушак і салодкіх кампазіцый да галоўнага каравая свята, які ўражвае сваімі паўтараметровымі габарытамі, вытанчаным дэкорам і бясконцай фантазіяй майстроў.
Акрамя кулінарных і рамесных пляцовак, свята прапануе дынамічныя забавы. Аматараў актыўнага адпачынку і вострых адчуванняў чакаюць з 12:00. Віцябляне, магутныя не толькі духам, але і целам, змогуць паказаць сваю сілу ў абласных спаборніцтвах па сілавым мнагабор'і, а юныя спартсмены пазмагаюцца ў міні-футболе і валейболе. Пры спрыяльным надвор'і ў гасцей будзе ўнікальная магчымасць падняцца ў неба і ўбачыць Чашнікі з вышыні птушынага палёту — арганізатары прапануюць палёты на дэльтаплане і паветраным шары.
Для самых маленькіх удзельнікаў і іх бацькоў на стадыёне сярэдняй школы №4 адкрыецца цэлы «Дзіцячы гарадок» з атракцыёнамі. Тут жа Беларускі тэатр «Лялька» пакажа інтэрактыўны спектакль «Калабок», а таксама правядзе цікавыя майстар-класы і розныя інтэрактывы. Хлопцы старэйшыя змогуць паспрабаваць сябе ў караоке-віктарыне, квест-гульні, а таксама зрабіць яркія сэлфі ў тэматычнай фотазоне, каб захаваць памяць пра «Дажынкі». Аматараў хуткага двухколавага транспарту запрашаюць на мотавыставу. А з 16:00 за настрой гасцей будуць адказваць прафесійныя дыджэі, якія граюць запальныя і рытмічныя міксы.
"Віцебскаблаўтатранс" арганізуе спецыяльныя аўтобусныя маршруты на "Дажынкі" ў Чашнікі
Кульмінацыяй свята стане праграма на галоўнай сцэнічнай пляцоўцы па вуліцы Савецкай. У 14:00 тут адбудзецца ўрачыстая цырымонія ўшанавання перадавікоў АПК Віцебшчыны, чыя карпатлівая праца і прафесіяналізм унеслі неацэнны ўклад у сёлетні багаты каравай вобласці. Увечары, у 18:00, пачнецца вялікі канцэрт з удзелам зорак айчыннай эстрады, які плаўна пяройдзе ў відовішчны феерверк у 20:00. Пасля яркага салюту гасцей абласных «Дажынак» чакае зачаравальнае лазернае шоу і начная дыскатэка, дзе кожны зможа натанцавацца ўдосталь пад любімыя рытмы.