«Шэсце пакаленняў», ваенны парад, песенны флэшмоб. Што яшчэ запланавана на Дзень Перамогі ў Віцебску?

Святочныя мерапрыемствы стартуюць а 10.00 з плошчы Леніна. Адсюль на плошчу Перамогі па вуліцы Леніна будзе рухацца "Шэсце пакаленняў". Парад войскаў Віцебскага гарнізона, у якім возьмуць удзел кадэты, разам з ваеннай тэхнікай таксама дойдуць да цэнтральнай плошчы горада па праспекце Чарняхоўскага. Затым – ускладанне вянкоў і кветак да мемарыяльнага комплексу ў гонар савецкіх воінаў-вызваліцеляў, партызан і падпольшчыкаў Віцебшчыны, мітынг. З 11.30 тут будзе праходзіць канцэртная праграма духавых аркестраў.

З іншага боку плошчы Перамогі да вечара будуць выступаць творчыя калектывы, а з 19.00 гледачы змогуць атрымаць асалоду ад рок-хітоў. Побач са сцэнай будуць працаваць інтэрактыўная выстава "Тры аповеды пра вайну", гульнёвыя і спартыўныя пляцоўкі, выстава ваеннай тэхнікі.

На буйных пляцоўках горада, напрыклад, у мікрараёне Медцэнтр, Білева, у комплексе культурна-масавага адпачынку імя Савецкай арміі праграму "Наша пераможная вясна" прадставіць мабільная агітбрыгада.

Для юных жыхароў Віцебска правядуць конкурс малюнкаў на асфальце. Выявіць "Пераможны май" яны змогуць з 10.30 да 11.30 на пляцоўцы каля Музея сучаснага мастацтва.

У 12.00 запрашаюць усіх аматараў актыўнага адпачынку далучыцца да лёгкаатлетычнага забегу "Сэрца Віцебска" па маршруце плошча Перамогі – вул. Калініна – вул. Замкавая – пр-т Фрунзе да набярэжнай Віцьбы і назад.

У дворыку абласнога музея Героя Савецкага Саюза М. Ф. Шмырова а 12.00 можна будзе паглядзець пад адкрытым небам спектакль "Радавыя". На працягу дня тут будзе размешчана выстава "Партызанскі партрэт".

Кінапаказы на ваенную тэматыку пройдуць у Студэнцкім скверы і ў дворыку абласнога краязнаўчага музея.

Прадстаўнікоў залатога ўзросту запрашаюць на "Майскі вальс" ля фантана ў парку Фрунзе з 16.00 да 20.00.

Актыўныя забавы дзетвара і дарослыя знойдуць у парку Пераможцаў, дзе будуць працаваць атракцыёны, вулічныя кафэ.

Упершыню на плошчы Перамогі ля мемарыяльнага комплексу адбудзецца вечаровы канцэрт, дзе творчыя калектывы горада выканаюць шлягеры ваенных гадоў. Сюды запрашаюць усіх ахвотных а 21.00. За пяць хвілін да маляўнічага святочнага феерверка, а 22.55, артысты і гледачы змогуць прыняць удзел у флэшмобе – супольна выканаць песню "Дзень Перамогі".

З поўнай праграмай мерапрыемстваў можна азнаёміцца тут.

"Віцебскія весці"