Суботнік даўжынёй у год. У Медыяцэнтры Віцебскай вобласці распавялі пра мерапрыемствы Года добраўпарадкавання

Абласны план мерапрыемстваў Года добраўпарадкавання ўключае шматлікія працоўныя акцыі і дэсанты, накіраваныя на добраўпарадкаванне мемарыялаў, памятных і знакавых месцаў, азеляненне тэрыторый населеных пунктаў. Працягнецца рамонт і будаўніцтва вулічна-дарожнай сеткі, стаянак і парковак, спартыўных і дзіцячых гульнявых пляцовак. Важныя напрамкі – забеспячэнне працы сістэм водазабеспячэння, уцягванне ў гаспадарчы абарот невыкарыстоўваемых зямельных участкаў, навядзенне парадку на вытворчых аб'ектах. Пачатыя і маючыя адбыцца справы абмеркавалі на прэс-канферэнцыі «Дабраўпарадкаванне з акцэнтам на якасць» у Медыяцэнтры Віцебскай вобласці.

Дабраўпарадкаванне – агульная справа, на якую павінны мабілізавацца ўсе. Толькі разам мы зможам стварыць і зберагчы вакол сябе камфортнае, утульнае, прыгожае асяроддзе пражывання.

СКАЗАЛА:
Рэспубліканскім суботнікам завершыцца месячнік добраўпарадкавання, які праходзіць у цяперашні час на Віцебшчыне. Сабраныя сродкі пералічаць на будаўніцтва Нацыянальнага гістарычнага музея Беларусі. 
Адкрыццё плошчы сцяга і герба ў абласным цэнтры адбудзецца ў рамках святкавання Дня Дзяржаўных сцяга, Дзяржаўнага герба і Дзяржаўнага гімна Рэспублікі Беларусь.
У гонар вылучэння Оршы на прысваенне ганаровага звання СНД «Горад працоўнай славы. 1941 – 1954 гг.» добраўпарадкуюць сквер і стэлу «Орша – горад працоўнай славы».

 Разлічаны да снежня
– Зацверджаны план-графік па добраўпарадкаванні знакавых аб'ектаў у вобласці – не менш аднаго штомесяц – паведаміў намеснік старшыні аблвыканкама Дзмітрый Петруша. – Ён разлічаны да снежня. Мерапрыемствы накіраваны на азеляненне тэрыторый, развіццё паркаў і сквераў, добраўпарадкаванне памятных месцаў, рэкрэацыйных зон – экасцежак, крыніц.
Так, вясной закладуць сквер у гонар 80-годдзя Вялікай Перамогі ў Чашніках, парк з Алеяй Памяці на Кургане Славы ў Глыбоцкім раёне. Высадзяць сотні дрэў на мемарыяльным комплексе «Пяты полк» у Віцебску, а ў чэрвені тут адкрыюць знак у памяць аб ахвярах генацыду беларускага народа. У маі ўсталююць помнік на воінскім пахаванні ў в. Паўлюш Ушацкага раёна…
Гэта базавы план, які ў ходзе рэалізацыі можа быць дапоўнены іншымі мерапрыемствамі.
Віцебшчына не абмяжуецца вясновым рэспубліканскім суботнікам. На працягу года іх будуць арганізоўваць на ўсіх узроўнях, ад абласнога да раённых і гарадскіх.

Запрашаюць узаемадзейнічаць

– Плануем правесці рамонт 1,3 млн кв. м дарог, што амаль на 30 % перавышае фактычны паказчык 2023 года, – начальнік галоўнага ўпраўлення жыллёва-камунальнай гаспадаркі аблвыканкама Юрый Дзядзёла нагадаў задачы па вулічна-дарожнай сетцы населеных пунктаў. – Заменім 13,7 тыс. святлодыёдных свяцільнікаў. Гэта дае эканомію на 50-60 % па энергазберажэнні і забяспечвае лепшае асвятленне.
У рэгіёне плануюць пабудаваць 11 новых станцый абезжалезвання, 195 міні-станцый, а таксама добраўпарадкаваць 25 і адрамантаваць больш за 280 дзіцячых спартыўных і гульнявых пляцовак.
Многія жыльцы шматкватэрнага жылфонду не супраць удзелу ў навядзенні парадку на тэрыторыях сваіх дамоў. Камунальныя службы гатовы ісці ім насустрач, прадастаўляць рабочы інвентар, глебу, транспарт, пасадачны матэрыял. Для арганізацыі ўзаемадзеяння ініцыятары могуць звяртацца ў свае ЖЭУ. 

Эколагі на варце

– Планы на Год добраўпарадкавання ў паўночным рэгіёне грандыёзныя: запланавана высадка 30 тыс. дрэў, 28 тыс. кустоў, 3,5 млн штук расады кветак, – падкрэсліла намеснік старшыні камітэта прыродных рэсурсаў і аховы навакольнага асяроддзя Ганна Галуза. – У працу актыўна ўключыліся ўсе раёны. Пройдзе Адзіны дзень азелянення. Прыйшоў час абнавіць дрэвы, пасаджаныя ў дварах прадстаўнікамі ваеннага і пасляваеннага пакаленняў.
Стварэнне спрыяльнага асяроддзя пражывання – гэта не толькі высадка зялёных насаджэнняў. Яно прадугледжвае правядзенне прыродаахоўных акцый, у тым ліку з удзелам грамадскіх эколагаў: «Зробім», «Чысты лес», «Чысты вадаём».
Узмацняем работу па недапушчэнні ўтварэння і ліквідацыі несанкцыянаваных звалак, выпальвання сухой расліннасці, захаванні рэжымаў ажыццяўлення гаспадарчай дзейнасці ў водаахоўных зонах і прыбярэжных палосах.

Па прапановах грамадзян

– Самае важнае і каштоўнае ў праектах грамадзянскіх ініцыятыў – гэта тое, што іх аўтарамі і рэалізатарамі з'яўляюцца самі людзі, – адзначыла дырэктар выканаўчай дырэкцыі абласной Асацыяцыі мясцовых Саветаў дэпутатаў Кацярына Лазоўская. – Усе яны маюць грамадскую значнасць, 90% звязаны з добраўпарадкаваннем.
У 2024 годзе на разгляд асацыяцыі падалі 23 праекты, 16 прызналі лепшымі, іх ужо рэалізавалі на месцах. У 2025-м прадставілі 64 праекты, 15 з іх атрымаюць фінансаванне ў суме каля 400 тыс. рублёў для ўвасаблення ў жыццё. Якія менавіта – стане вядома ў бліжэйшыя дні.

Адрасы пераўтварэнняў

– У раёне прынялі рашэнне аб замацаванні арганізацый за землямі агульнага карыстання, сельсаветамі, воінскімі пахаваннямі, – далажыла старшыня Аршанскага райвыканкама Іна Хамутоўская. – Вызначылі 10 знакавых месцаў для правядзення раённых суботнікаў. У іх ліку: Парк герояў, плошча Герба і Сцяга, парк ім. Якубоўскага, пляж у г.п. Копысь.
Добраўпарадкаванне закране такія значныя аб'екты, як дзіцячы парк, пляж на вул. Караткевіча, мост на вул. Шклоўскай у райцэнтры. Працягнецца будаўніцтва патрыятычнага клуба. Да раённага фестывалю-кірмашу працаўнікоў вёскі ператворыцца аг. Смальяны.

Ідуць ад запытаў

– Мясцовыя органы ўлады праводзяць вялікую тлумачальную працу з насельніцтвам, каб уцягнуць яго ў рэалізацыю задач Года добраўпарадкавання, – распавёў старшыня Лепельскага райсавета дэпутатаў Ігар Урбан. – Мы хочам, каб жыхары нашага краю ганарыліся сваёй гісторыяй. Для гэтага ў в. Бароўка ўсталёўваем манументальны помнік у гонар курсантаў і камандзіраў тутэйшых пяхотнага і мінамётнага вучылішчаў, якія прынялі на сябе цяжкія баі 1941-га.
У той жа Бароўцы патрэбен пляж: летам на аз. Шчыбот штодня адпачываюць ад ста чалавек. Мы вядзём падрыхтоўчыя работы для надання афіцыйнага статусу стыхійнаму месцу адпачынку. Вычысцілі дно, усталявалі кантэйнеры для збору смецця, распранальню і іншыя элементы добраўпарадкавання – усё за кошт сродкаў самаабкладання.
Каб мінімізаваць цяжкую ручную працу, у раён набылі падмятальна-прыбіральную машыну і камунальны пыласос. Наводзіць парадак стала лягчэй і хутчэй, вызваленых людзей можам прыцягваць да працы на іншых участках.

"Віцебскія весці"