Лічбавая гігіена супраць кібератак. Уладзімір Юргевіч правёў Адзіны дзень інфармавання у Віцебскім аддзяленні БЧ
Кібератакі на інфармацыйную структуру – адна з найбольш значных і пастаянна растучых пагроз для глабальнай бяспекі ў наш час. На фоне ўсеагульнай лічбавізацыі дадзеная праблема эвалюцыянуе, і гэтаму спрыяе шырокае выкарыстанне штучнага інтэлекту. На гэтым завастрыў увагу памочнік Прэзідэнта Рэспублікі Беларусь – інспектар па Віцебскай вобласці Уладзімір Юргевіч на сустрэчы з калектывам Віцебскага аддзялення Беларускай чыгункі ў рамках Адзінага дня інфармавання.
Для нашай краіны праблема кіберпагроз вельмі актуальная. Па выніках даследавання, праведзенага ў мінулым годзе, Беларусь знаходзіцца на трэцім месцы ў рэйтынгу краін СНД, якія часцей за ўсё падвяргаюцца кібератакам.
– Кожная пятая атака ў нашай краіне прыпадае на дзяржсектар, на другім месцы сфера прамысловасці, на трэцім – фінансавая галіна, – адзначыў Уладзімір Юргевіч.
Пры гэтым кожная другая кібератака прыводзіць да ўцечкі канфідэнцыяльных даных. Больш за палову скрадзеных звестак – гэта персанальныя даныя і камерцыйныя таямніцы.
У Беларусі барацьба з кіберпагрозамі вядзецца па некалькіх напрамках. Указам Прэзідэнта «Аб кібербяспецы» рэалізуецца комплексны шматузроўневы механізм процідзеяння кібератакам на дзяржорганы і арганізацыі, крытычную інфармацыйную структуру. Створаны Нацыянальны цэнтр кібербяспекі і рэагавання на кіберінцыдэнты. Наладжваецца міжнароднае супрацоўніцтва ў гэтай сферы. Прымаюцца і іншыя меры.
– Разам з тым, каб абарона персанальных даных была па-сапраўднаму эфектыўнай, патрэбны агульныя намаганні – не толькі дзяржавы, але і грамадзян, – падкрэсліў памочнік Прэзідэнта. – Патрабуецца павышэнне пісьменнасці насельніцтва, выкананне элементарных правіл лічбавай гігіены.
Асаблівую актуальнасць тэма лічбавай гігіены набывае ў дачыненні да падрастаючага пакалення. Неакрэплая псіхіка, схільнасць да ўнушэння і маніпулявання робяць дзяцей лёгкай здабычай для зламыснікаў.
– Бяспека дзяцей у сетцы – гэта не проста забароны, а стварэнне абароненай асяроддзя і навучанне правільным паводзінам, – падкрэсліў спікер. – У сям'і неабходна выбудоўваць даверлівыя адносіны з дзіцем. Дзеці не павінны шукаць разумення ў незнаёмцаў у сетцы, а быць упэўненымі, што могуць расказаць бацькам пра любую дзіўную ці непрыемную сітуацыю без страху быць пакаранымі.