Напярэдадні пасяўной праваахоўнікі Віцебскай вобласці праводзяць рэйды па аб'ектах АПК
Пад кантролем міліцыі знаходзяцца п'янства на працоўным месцы, халатнае стаўленне да захаванасці маёмасці, крадзеж паліва, тэхнічны стан транспартных сродкаў.
«Спячы рэжым» пад прыцэлам
Здавалася б, тэхніка толькі выходзіць з рэжыму кансервацыі і на палі яшчэ не выязджае масава, але менавіта гэты перыяд міжсезоння, як высвятляецца, з'яўляецца часам павышанай рызыкі.
– Супрацоўнікі РАУС штодня выязджаюць на аб'екты АПК, каб праверыць умовы захоўвання паліва, запчастак і угнаенняў, а таксама ацаніць фізічны стан работнікаў, – адзначыў намеснік начальніка аддзела аховы правапарадку Гарадоцкага РАУС Аляксандр Ярмола.
ААТ «Птушкафабрыка Гарадок» – адно з ключавых прадпрыемстваў Віцебскай вобласці, таму маніторынг належнага ёй мехдвара ў праваахоўнікаў на асаблівым кантролі.
Чаму менавіта цяпер? У міліцыі тлумачаць: калі пасяўная пачнецца, гаспадарка пяройдзе на авральны рэжым працы і ўстараняць недахопы будзе позна. У дадзены момант ёсць магчымасць выявіць слабыя месцы, не чакаючы, пакуль яны прывядуць да правапарушэнняў.
– Правяраем інвентарызацыю наяўнай тэхнікі, каб у далейшым па базе вырабляць маніторынг яе стану на працягу ўсёй пасяўной, – тлумачыць старшы оперупаўнаважаны групы БЭЗ Гарадоцкага РАУС Аляксандр Захараў.
Адкрываючы капот і правяраючы «жалезнае здароўе» трактара, механізатар Віктар Іваноў заўважае, што тэхніка хоць і не новая, але да севу гатова: зімой усё адрамантавалі, адрэгулявалі.
Цвярозы разлік
Асаблівую ўвагу аператыўнікі надаюць чалавечаму фактару, у прыватнасці выпадкам знаходжання сельгасработнікаў на працоўных месцах у стане алкагольнага ап'янэння.
– Прафілактычныя рэйды паказваюць, што праблема падобных парушэнняў застаецца актуальнай. Інфармацыя аб кожным такім выпадку неадкладна перадаецца кіраўнікам гаспадарак. Для парушальнікаў гэта пагражае не толькі адміністрацыйным пратаколам, але і сур'ёзнымі дысцыплінарнымі спагнаннямі, аж да звальнення, – канстатаваў Аляксандр Ярмола.
Гарадоцкая птушкафабрыка актыўна развіваецца, запускаюцца новыя цэхі і ўкараняюцца сучасныя тэхналогіі. На прадпрыемстве, дзе працуюць сотні чалавек, пытанні дысцыпліны пад асаблівым кантролем.
– Мінулагодні сезон быў вельмі цяжкі. Каб аднавіць тэхніку, механізатары працавалі і зімой. Для гэтага ў нас ёсць усе ўмовы. Калі надвор'е не падвядзе, то ўжо ў бліжэйшы час плануем пачаць пасяўную, – адзначыў інжынер-механік машынна-трактарнага парку Яўген Каваленка.
Убачыўшы камісію, супрацоўнікі прадпрыемства не спалохаліся: тут праца кіпіць. Супрацоўнік ДАІ праверыў у кіроўцаў колькасць праміле. Запісаў у пратакол: «Заўваг няма».
Але рэйд гэтым не абмежаваўся, дзяржаўтаінспектар просіць журналы выхаду і вяртання сельгастэхнікі, аглядае транспарт: яго тэхнічная спраўнасць – гэта адзін з самых важных складнікаў поспеху пасяўной кампаніі.
– Мы не толькі правяраем дакументы, але і гутарым з кіроўцамі аб укамплектаванасці неабходнымі запчасткамі. Звяртаем увагу на наяўнасць святлоадбівальных элементаў, каб у будучыні выключыць ДТЗ на дарогах у цёмны час сутак, – расказаў в.а. старшага дзяржаўтаінспектара аддзялення ДАІ Гарадоцкага РАУС Аляксей Емяльянаў.
Хіба пачынаюцца з дзірак у плоце
Аналіз мінулых гадоў паказвае: для аматараў лёгкай нажывы АПК – смачнае месца. Прадметам замахаў часцей за ўсё становяцца гаруча-змазачныя матэрыялы і запчасткі. Таму зараз міліцыянеры правяраюць, наколькі моцныя замкі на складах, ці ёсць асвятленне па перыметры і ці працуе вартаўнiчая ахова. Нядобрая тэхнічная ўмацаванасць аб'ектаў захоўвання – гэта прамы сігнал для патэнцыйных злодзеяў.
– Па лініі аддзела аховы правапарадку прадпрыемству будзе вынесена прадстаўленне аб ліквідацыі пашкоджання агароджы і паляпшэнні асвятлення тэрыторыі, дзе захоўваецца чорны металалом, які можа быць падвергнуты крадзяжу, – заўважыў Аляксандр Ярмола.
Рэйды РАУС – гэта ўжо стандартная практыка. Праваахоўнікі падкрэсліваюць: іх задача – не толькі пакараць парушальнікаў, але і захаваць ураджай, які яшчэ нават не пасеяны. А для Гарадоцкай птушкафабрыкі, дзе ставяць рэкорды па вытворчасці высакаякаснай прадукцыі, захаванасць маёмасці і працоўнай дысцыпліны – прамы ўклад у харчовую бяспеку краіны.