У Віцебску пачалася акрэдытацыя ўдзельнікаў і гасцей фестывалю мастацтваў
Вікторыя і Ліяна Данілавы:
– Сёння дачка атрымала акрэдытацыю. Гэта неверагодна хвалююча! – сказала Вікторыя. – Ганаруся ёю! На мой погляд, «Славянскі базар» – сапраўды ўнікальная падзея, дзе мастацтва і творчасць аб’ядноўваюць людзей, дорачы ім незабыўныя моманты.
– Гэта мая мара, і яна нарэшце ажыццявілася! Заўтра я выступлю на «Зоркі TikTok», і дух захоплівае ад хвалявання, – не хавае сваіх эмоцый Ліяна, для якой удзел у «Славянскім базары» – гэта выкананне мары. – З нецярпеннем чакаю свайго выступу на вялікай сцэне. У нас запланавана пяць нумароў. Я хвалююся, але веру, што мы старанна працавалі не дарма. Бейдж акрэдытацыі для мяне – сімвал гэтага незабыўнага свята. Буду захоўваць яго як памяць пра фестывальны Віцебск, да якога я таксама маю дачыненне.
Дамініка Пятроўская:
– Мы выступаем на галоўных пляцоўках «Славянскага базару» – у Летнім амфітэатры і Віцебскім цэнтральным спартыўным комплексе.
Хоць хваляванне ўжо не такое моцнае, як у мінулыя гады, але ўсё ж прысутнічае. Кожны раз з нецярпеннем чакаю «Славянскі базар», бо гэта не проста фестываль, а сапраўднае свята. У гэтыя дні любімы Віцебск пераўтвараецца. Ён становіцца атмасферным, прыгожым і поўным жыцця. Тут пануе асаблівая магія, якая натхняе нас на выступленні. Уражанні ад фестывалю цудоўныя. Ён з кожным годам становіцца ўсё лепш і лепш!
Дарэчы, на фотаздымку для бейджа я сама сабе вельмі спадабалася. З першага разу атрымалася так, як я хацела. Гэта значыць, што ў маёй калекцыі цяпер прыбавілася яшчэ адно ўдалае фота, якое будзе нагадваць пра незабыўныя моманты.
Дзіяна Буза:
– «Славянскі базар» – гэта не проста падзея, гэта сапраўдны брэнд, які робіць Віцебск вядомым на ўвесь свет. І гэта выклікае ў мяне гонар. Кожны год з нецярпеннем чакаю гэтага свята, і паглядзіце, як горад ажыў і пераўвасобіўся.
Я ўдзельнік шоу-балета, мы рыхтуемся да выступленняў на галоўных пляцоўках фестывалю. Мы доўга рэпеціравалі і ўклалі шмат сіл у нашы нумары. Я з нецярпеннем чакаю выхаду на сцэну.
Ад «Славянскага базару» чакаю не толькі яркіх выступленняў, але і весялосці. Канцэрты ствараюць неверагодны святочны настрой. Часам здаецца, што ўвесь горад спявае і танцуе.
У тэлефоне з'явіцца шмат новых прыгожых фотаздымкаў, а на памяць застануцца сувеніры, якія будуць нагадваць аб незабыўных момантах. «Славянскі базар» – гэта час, калі Віцебск становіцца сапраўдным цэнтрам радасці і творчасці.