У Віцебску Патрыяршы экзарх усяе Беларусі ўзначаліў набажэнства і павіншаваў прыхаджан са святам Дабравешчання
Наведванне паўночнай сталіцы прадстаяцелем Беларускай праваслаўнай царквы ў гэты знамянальны дзень стала добрай традыцыяй. Каля храма з кветкамі і хлебам-соллю ўладыку сустракалі вернікі і святары. Нягледзячы на раптоўную снежную стыхію, што абрынулася на горад, тут было шматлюдна. У набажэнстве прынялі ўдзел старшыня аблвыканкама Аляксандр Субоцін і кіраўнік абласнога дэпутацкага корпуса Дзмітрый Дзямідаў.
Здавён праваслаўныя вернікі шануюць Благавешчанне як адно з 12 галоўных свят рэлігійнага календара і вераць, што ў гэты дзень Гасподзь чуе іх малітвы і ажыццяўляе ўсе просьбы. Па народным жа календары 7 красавіка асацыюецца з надыходам вясны і абуджэннем жыццёвых сіл прыроды.
Падчас літургіі Патрыяршы Экзарх нагадаў прыхаджанам пра біблейскую традыцыю свята. У Евангеллі ад Лукі гаворыцца, што ў гэты красавіцкі дзень архангел Гаўрыіл прынёс Дзеве Марыі добрую вестку пра зачацце ёю Сына Божага словамі: «Радуйся, Дабрадатная! Гасподзь з табою! Благаслаўлёная ты між жанчынамі». І Анёл апавясціў: «...бо ты знайшла ласку ў Бога, і вось, ты зачнеш ва ўлонні сваім, і народзіш Сына, і дасі Яму імя: Ісус».
– У наш час, калі размываюцца духоўна-маральныя межы, вельмі важна фарміраваць у сабе якасці, якія ёсць у Дзевы Марыі: чысціню, цнатлівасць, сціпласць. Благая вестка, прынесеная Божай Маці, – гэта пасланне ўсяму чалавецтву аб тым, што Гасподзь любіць людзей і клапоціцца пра іх, стараецца выліць на нас свае міласці. І той, хто гатовы прыняць гэтыя шчодраты, атрымлівае іх. Людзям у сучасным свеце вельмі патрэбна дапамога Божая ў іх працах і клопатах. Таму будзем жыць па прыкладзе Маці Божай і праз яе звяртацца да Бога, – адзначыў уладыка Веніямін.
– Нягледзячы на непагадзь, у гэты свята адчуваю неперадавальныя пачуцці радасці, дабра і цеплыні. Дзеля гэтых светлых пачуццяў хочацца прыходзіць у храм. Не ў першы раз удзельнічаю ў Дабравешчанскім набажэнстве ў Віцебску, і асабліва прыемна ўсведамляць, што ў гэты дзень нас наведвае прадстаяцель Беларускай праваслаўнай царквы, візіты якога вельмі важныя для рэгіёну, – падкрэсліў Аляксандр Субоцін.
Пасля літургіі пад звон званоў уладыка Веніямін разам з архіепіскапам Віцебскім і Аршанскім Дзімітрыем і прадстаўнікамі кіраўніцтва вобласці павіншавалі ўсіх прысутных са светлым святам і выпусцілі ў неба беласнежных галубоў. Гэтая традыцыя азначае сабой добрыя весткі і свабоду, якую Ісус дараваў людзям, а таксама сімвалізуе Святога Духа, які выяўляецца ў Святым Пісанні ў выглядзе галуба.
"Віцебскія весці"