У Віцебскай вобласці стартаваў семінар вадалазна-выратавальных службаў МНС Беларусі, Расіі і Казахстана

Сёння на возеры Доўгае ў Глыбоцкім раёне Віцебскай вобласці стартаваў семінар з работнікамі вадалазна-выратавальных службаў па арганізацыі і правядзенні вадалазных спускаў і работ ва ўмовах экстрэмальна нізкіх тэмператур. У семінары прымаюць удзел прадстаўнікі вадалазных службаў пажарных аварыйна-выратавальных атрадаў абласных упраўленняў МНС, Расспас "ЗУБР" МНС Беларусі, МНС Расійскай Федэрацыі і Рэспублікі Казахстан, паведамляе прэс-служба абласнога ўпраўлення МНС.

Галоўная мэта семінара – абмен вопытам паміж работнікамі вадалазна-выратавальных службаў і навучанне асабовага складу бяспечным метадам вядзення вадалазных работ з лёгкавадалазным і вентыляваным рыштункам, правядзенне падводных пошукава- і аварыйна-выратавальных работ, а таксама падводна-тэхнічных ва ўмовах адмоўных тэмператур паветра.

З самай раніцы адбылося адкрыццё семінара. У межах яго ўдзельнікі ўсклалі кветкі да брацкай магілы воінаў і партызан, якія загінулі пры вызваленні Глыбокага ў ліпені 1944 года. Намеснік начальніка абласнога ўпраўлення МНС Сяргей Маркевіч сказаў: «Перамога ў Вялікай Айчыннай вайне – гэта непахісная гісторыя, якую мы праносім праз час, перадаём дзецям і захоўваем як вялікую спадчыну народа-пераможцы».

Наступным этапам семінара стала тэарэтычная частка. Удзельнікі разгледзелі пытанні аховы працы і медыцынскага забеспячэння вадалазных спускаў, агульныя метады і спосабы правядзення выратавальных, пошукавых і падводна-тэхнічных работ, астрапоўку і дастаўку прадметаў на паверхню, аказанне дапамогі аварыйнаму вадалазу пад лёдам. Акрамя гэтага, былі разгледжаны і трагічныя выпадкі гібелі вадалазаў і дайвераў.

Значную частку заняло вывучэнне сучасных відаў вадалазнага рыштунку, абсталявання і тэхнікі, іх характарыстык і асаблівасцей прымянення, сярод якіх вадалазны комплекс на базе шасі МАЗ, падводная сувязь Oceanreef Alpha Pro X-divers і інш.

Ужо заўтра ўдзельнікі семінара пяройдуць да яго практычнай часткі: даставанне пацярпелых, правядзенне тэхнічных работ пад вадой і інш. Дарэчы, семінар праходзіць на самым глыбокім возеры Беларусі. З-за яго глыбіні, чысціні вады і стромкіх берагоў яго часта называюць «Беларускім Байкалам».

Віцебскія весці