Пытанні дзелавога ўзаемадзеяння свабодных і асаблівых эканамічных зон у рамках Саюзнай дзяржавы і ЕАЭС абмеркавалі ў Віцебску
Панэльная дыскусія такога маштабу і такой тэматыкі ўпершыню праходзіла ў Беларусі. Ініцыятарам выступіла СЭЗ «Віцебск». Як растлумачыў кіраўнік яе адміністрацыі Міхаіл Скурат, ідэя нарадзілася падчас міжнароднага форуму, які праходзіў у Дубна Маскоўскай вобласці.
– Мы дамовіліся, што на віцебскай пляцоўцы правядзем сустрэчу, галоўная задача якой – сабраць на адзінай пляцоўцы прадстаўнікоў СЭЗ і АЭЗ з трох краін (Беларусь, Расія, Казахстан) для выпрацоўкі канкрэтных кааперацыйных праектаў з мэтай іх наступнага фінансавання за кошт грашовых сродкаў, выдзеленых Еўразійскай эканамічнай камісіяй на субсідаванне такіх праграм, – адзначыў Міхаіл Скурат.
У ліку галоўных тэм, вынесеных на абмеркаванне, – шляхі кааперацыі тэрыторый з прэферэнцыйным рэжымам у Саюзнай дзяржаве і ЕАЭС, механізмы павышэння іх інвестыцыйнай прывабнасці і фінансавання сумесных інвестыцыйных праектаў.
Першапачаткова такія эканамічныя зоны ствараліся на дзяржаўным узроўні як кропкі росту, з прывабнымі ўмовамі для інвестараў. І яны даказалі сваю жыццяздольнасць. Так, сёння на пляцоўках СЭЗ «Віцебск» рэалізуюцца праекты па выпуску высокатэхналагічнай прадукцыі ў фармацэўтычнай галіне, машына- і станкабудаванні, харчовай і лёгкай прамысловасці. У маладой актыўна развіваецца свабоднай эканамічнай зоне «Брэміна–Орша» зарэгістравана шэсць рэзідэнтаў, рэалізуюцца дзевяць інвестпраектаў, у першую чаргу накіраваных на развіццё і аказанне транспартна-лагістычных паслуг. У бягучай пяцігодцы аб'ём інвестыцый рэзідэнтаў СЭЗ вобласці перавышае мільярд долараў.
Дальнейшае развіццё свабодных эканамічных зон у межах Саюзнай дзяржавы і Еўразійскага эканамічнага саюза мае вялікія перспектывы ў першую чаргу ў частцы рэалізацыі сумесных праектаў па развіцці прамысловай кааперацыі.
Прадстаўнік Міністэрства эканамічнага развіцця Расійскай Федэрацыі ў Рэспубліцы Беларусь Ілья Фёдараў адзначыў, што ў Расіі дзейнічаюць 56 асаблівых эканамічных зон.
– Важны не толькі абмен вопытам з кіруючымі кампаніямі розных краін, але ўзаемадзеянне паміж рэзідэнтамі. У нас вялікі патэнцыял у плане кааперацыі, прасоўвання прадукцыі на рынках. У межах ЕАЭС уведзены інструмент падтрымкі прамысловай кааперацыі, якая распаўсюджваецца як мінімум на тры краіны. Гэты фармат працы вельмі цікавы, у яго вялікія перспектывы. Ужо зацверджана два праекты, – падкрэсліў Ілья Фёдараў.
У рэалізацыі аднаго з іх прымае ўдзел рэзідэнт СЭЗ «Віцебск» – ТАА «Гідрапрэс». Гэта маштабны праект развіцця хуткаснай магістралі. Першая галіна злучыць Маскву і Санкт-Пецярбург. Усяго ж прадугледжана чатыры маршруты, адзін з іх – Мінск – Масква. На хуткасным цягніку, які рухаецца з хуткасцю 400 км/г, можна будзе дабрацца з адной сталіцы ў іншую за 3 гадзіны.
– Наша прадпрыемства атрымала добры камерцыйны заказ. Мы пастаўляем абсталяванне (чатыры прэсы) для Мурамскага стрэлачнага завода, які асвоіў інавацыйны стрэлачны перавод, ён будзе ўжыты для хуткаснай магістралі. Ганарымся, што ўдзельнічаем у сумеснай праграме Беларусі, Расіі і Казахстана. Гэта вельмі перспектыўны напрамак з вялікім эфектам, – растлумачыў дырэктар па развіцці ТАА «Гідрапрэс» Аляксандр Лукашок.
Аб інвестыцыйнай прывабнасці казахстанскай спецыяльнай эканамічнай зоны распавёў намеснік старшыні праўлення міжнароднага цэнтра прымежнага супрацоўніцтва «Харгос» Дамір Кадыр.
– «Хоргос» знаходзіцца на мяжы Казахстана і Кітая, галоўны напрамак дзейнасці – турыстычны. Для прадстаўнікоў розных краін на дадзенай тэрыторыі прадугледжаны 30-дзённы бязвізавы рэжым. Для інвестараў, якія адкрываюць тут гандлёвыя і забаўляльныя цэнтры, створаны льготныя ўмовы. Ёсць планы абсталяваць прамысловую, індустрыяльную зону, рэзідэнты змогуць бесперашкодна вывозіць тавары ў Кітайскую Народную Рэспубліку, – распавёў Дамір Кадыр.
У межах форуму быў падпісаны мемарандум аб супрацоўніцтве эканамічных зон «Хоргос» і «Віцебск».
Госці азнаёміліся з прадукцыяй прадпрыемстваў-рэзідэнтаў СЭЗ «Віцебск», з турыстычным патэнцыялам Прыдзвінскага краю.