Выстава «Пра100 дапамагаем» у віцебскай ратушы распавядае пра дзейнасць Чырвонага Крыжа з XIX стагоддзя па цяперашні час
Прадстаўленыя экспанаты захавалі прыклады сапраўднага гуманізму, міласэрнасці і самаадданасці, з якімі супрацоўнікі Беларускага таварыства Чырвонага Крыжа дапамагалі людзям на розных этапах гісторыі ад моманту яго стварэння да нашых дзён. Руска-японская і Першая сусветная вайна, грамадзянская і Вялікая Айчынная, пасляваенная разруха – Чырвоны Крыж заўсёды быў на перадавой. Дзякуючы намаганням медсясцёр выратаваны тысячы жыццяў.
На выставе можна даведацца аб заснавальніках міжнароднага руху Чырвонага Крыжа Анры Дзюнане і Гюставе Муанье, аб першай даследчыцы і заснавальніцы сястрынскай справы Флорэнс Найцінгейл, аб дзейнасці арганізацыі на тэрыторыі сучаснай Беларусі з 1867 года.
Асобнае месца ў экспазіцыі аддадзена прадметам, якія распавядаюць аб гісторыі Віцебскай абшчыны сясцёр міласэрнасці, створанай у 1876 годзе і якая існавала больш за два дзясяткі гадоў. Яе выпускніцы неслі службу не толькі ва ўстановах абшчыны, але і выязджалі на барацьбу з эпідэміямі, іх адкамандзіроўвалі ў грамадзянскія бальніцы і ў ваенныя шпіталі. За самаадданасць, бясстрашнасць і мужнасць нямала віцебскія сёстры міласэрнасці ўдастойваліся ўзнагарод.
Адна з нашых зямлячак – удзельніца Вялікай Айчыннай вайны, Герой Савецкага Саюза Зінаіда Тусналобыва-Марчанка – стала трэцяй савецкай медсястрой і першай у Беларусі, удастоенай медалём імя Флорэнс Найцінгейл – найвышэйшай узнагародай для медыцынскіх сясцёр і братоў ва ўсім свеце.
У 1964 годзе была сфарміравана медыка-сацыяльная служба Беларускага Чырвонага Крыжа, работнікі якой і сёння даглядаюць адзінокіх пажылых і цяжка хворых людзей.
Яшчэ адзін напрамак працы Беларускага Таварыства Чырвонага Крыжа на сучасным этапе – дабрачынная і руплівая дзейнасць. Дапамога ахвярам узброеных канфліктаў, тэрарыстычных актаў, пацярпелым ад стыхійных бедстваў, аварый і тэхнагенных катастроф, бежанцам і незаможным – пра гэта таксама распавядаюць экспанаты выставы, як і пра працу па прафілактыцы небяспечных хвароб, у прыватнасці туберкулёзу і ВІЧ-СНІДу.
На выставе нямала ўнікальных архіўных прадметаў. Фотаздымкі, дакументы, паштоўкі, аптэкарскі посуд, узнагароды, маркі, плакаты, агітацыйная і асветніцкая літаратура і іншыя экспанаты не толькі з фондаў Віцебскага абласнога краязнаўчага музея і архіваў Віцебскай абласной арганізацыяй Беларускага Таварыства Чырвонага Крыжа, але таксама прадастаўлены Нацыянальнай бібліятэкай Беларусі, Віцебскай абласной бібліятэкай, Расійскай дзяржаўнай бібліятэкай, Дзяржаўным архівам Віцебскай вобласці, Нацыянальным гістарычным архівам Беларусі, Полацкім Нацыянальным гісторыка-культурным музеем-запаведнікам і А.Л. Памалейка. Паглядзець ёсць што.
Нягледзячы на паважаны ўзрост, Чырвоны Крыж ідзе ў нагу з часам, і сёння асноўная яго сіла – гэта валанцёры. Любы ахвотны можа папоўніць іх шэрагі. Затым добраахвотнікі павінны прайсці спецыяльную падрыхтоўку па аказанні дапамогі або прыняць удзел у інтэрактыўных занятках. Дарэчы, на выставе таксама функцыянавалі інтэрактыўныя пляцоўкі па першай дапамозе, здаровым ладзе жыцця.
Як адзначыў старшыня Віцебскага абласнога Савета дэпутатаў Уладзімір Цярэнтаў, аб важнасці і запатрабаванасці гэтага інстытута гуманізму сведчыць тое, што, нягледзячы на змену эпох, Чырвоны Крыж, створаны пры расійскай імператрыцы, працуе і па сённяшні дзень. На пачатку гэтай арганізацыі стаялі неабыякавыя людзі. Такія ж супрацоўнікі і валанцёры дапамагаюць і сёння людзям, якія апынуліся ў цяжкай жыццёвай сітуацыі.
Старшыня Віцебскай абласной арганізацыі БТЧК Галіна Жаланава паведаміла, што пасля заканчэння выставы ў ратушы экспазіцыя пераедзе ў СШ № 45 Віцебска, дзе ўжо 13 гадоў працуе музей Чырвонага Крыжа.
