Аблсельзбыт: як у Віцебскай вобласці ідзе ўборка кукурузы

На Віцебшчыне ўборка кукурузы на сілас пачалася нядаўна, аднак у гаспадарках імкнуцца паскорыць працэс — марозы ж на носе. Гэта можа знізіць ураджайнасць і пагоршыць якасць зялёнай масы. На раніцу 20 верасня гаспадаркі вобласці ўбралі пакуль 16 працэнтаў з 91 тысячы гектараў гэтай культуры.


Кукуруза — цеплалюбівая расліна, для якой біялагічна актыўная тэмпература — вышэй за 10 градусаў. Калі становіцца халадней, працэсы росту і развіцця практычна прыпыняюцца, расставіў акцэнты намеснік начальніка ўпраўлення земляробства, раслінаводства і кармавытворчасці камітэта па сельскай гаспадарцы і харчаванні Віцебскага абл­выканкама Юрый Раманаў:

— Замаразкі ў 2—3 градусы пашкоджваюць лісце. Мерзлыя расліны вельмі хутка загніваюць. Пакуль нарыхтоўваем толькі на сілас і зялёную падкормку, пра збожжа казаць яшчэ рана. Усё пакажа восень, ці паспее яно даспець да васковай спеласці. Але плануем убраць каля 5 тысяч гектараў і атрымаць 30 тысяч тон бурштынавага збожжа. Кукурузнага сіласу нарыхтавана 282 тысячы тон. Ураджайнасць зялёнай масы пакуль 223 цэнтнеры, але яна расце, таму што адразу ўбіраем горшыя ўчасткі, на падкормку. Улічваючы ўсе паказчыкі, павінны сабраць 1,8 мільёна тон.

У Полацкім раёне ўбралі 31 працэнт кукурузы. Адны з першых пачалі закладку на сілас аграрыі ААТ «Новыя Гараны», дзе пасеяна 150 гектараў.

— Пакуль кукуруза дала ўраджайнасць 240 цэнтнераў з гектара, але ўжо прайшліся замаразкі і па вале будзе адсоткаў на 30 менш. На збожжа не нарыхтоўваем. Наогул, мала хто на Віцебшчыне пры нашых умовах надвор'я робіць на гэта стаўку. Трэба дачакацца поўнай спеласці, убраць у пэўныя тэрміны, правільна падрыхтаваць да захоўвання, каб зберагчы збожжа. Гэта сапраўды лепшы малочнагонны корм, — адзначыў дырэктар ААТ «Новыя Гараны» Леанід Мурашка.

Добрыя вынікі па ўраджайнасці куку

кукурузы на сілас у Віцебскім раёне. Ва «Ольгаўскім» атрымалі 280 цэнтнераў з гектара, у «Мазалавагазе» — 300. Самая вялікая ўраджайнасць не толькі ў раёне, але і ў вобласці ва ўнітарным прадпрыемстве «Рудакова» — 307 цэнтнераў з гектара.

— Сакрата вялікага няма: унясенне мінеральных угнаенняў, у прыватнасці азоту, плюс выкарыстанне нямецкіх высокаўраджайных гібрыдных сартоў. Калі селекцыянеры плануюць на выхадзе 350—400 цэнтнераў зялёнай масы, то пры захаванні тэхналогій пасеву, догляду, цеплавога рэжыму і ўнясенні патрэбных угнаенняў гэтыя гібрыды стабільна трымаюць ніжні ўзровень ураджайнасці. Сёлета паўтара месяца паліла сонца, не было вільгаці, таму атрымалі ўсяго толькі 307 цэнтнераў, — распавёў намеснік дырэктара па раслінаводстве УП «Рудакова» Дзяніс Церашкоў.

Механізатар філіяла «Вясна-энерго» Рэспубліканскага ўнітарнага прадпрыемства электраэнергетыкі «Віцебскэнерго» Мікалай Стрыенак і кіроўца Віктар Андрэеў на ўборцы кукурузы.

Кукурузу трэба будзе ўбраць з плошчы каля 1,9 тысячы гектараў, каля 300 з іх плануюць пакінуць на збожжа.

— Па разліках, у выніку павінны атрымаць не менш за 250 цэнтнераў на круг, закласці сіласу каля 40 тысяч тон і каля 1,5 тысячы тон збожжа кукурузы. Так што ў буйной рагатай жывёлы будзе сытная зімоўка, — перакананы Дзяніс Уладзіміравіч.

Дзякуючы ўвядзенню ў рацыён малакагоннай кармоў надоі павінны быць высокімі, адпаведна, будзе годны заробак. Тых, хто працуе з поўнай аддачай на асноўных відах работ, у «Рудакове» з зарплатай не крыўдзяць: атрымліваюць аграрыі да двух тысяч рублёў у месяц.